CHEKA AENDELEA KUTAMBA KWAMBA ATAMMALIZA MTHAILAND PALE TEMEKE, LEO

CHEKA  (KATIKATI) AKIWA NA SALEH ALLY NA JOHN JOSEPH.

Bondia Francis Cheka, leo Jumamosi anatarajia kupanda ulingoni kupigana na Mthailand, Kitschai Singwancha, kwenye pambano la kimataifa la raundi kumi lisilo na ubingwa kwenye Ukumbi wa PTA Sabasaba, Temeke jijini Dar.

Mabondia hao jana Ijumaa walipimwa uzito ambapo Cheka alikuwa na uzito wa kilogramu 75.7 huku mpinzani wake akiwa na 75.

Cheka aliwaomba Watanzania kujitokeza kwa wingi kushuhudia anavyomchapa Mthailand huyo kwani amejiandaa kwa ushindi wa aina yoyote iwe kwa KO au pointi.

Kwa upande wake, Singwancha hakusita kutamba kuibuka na ushindi huku akisema amekuja Tanzania kwa kazi moja tu ya kumchapa Cheka.

Promota wa pambano hilo, Kaike Siraju, alisema maandalizi yanaenda vizuri na ametolea ufafanuzi kuhusu baadhi ya mabondia ambao walitarajiwa kupigana mapambano ya utangulizi.

“Kassim Ouma wa Marekani aliyetarajiwa kupigana na Shaban Kaoneka, mpaka jana (juzi) mchana alikuwa hajatua nchini licha ya kutumiwa tiketi mapema, pia Fred Nyakes aliyepaswa kupigana na Cosmas Cheka, naye hatakuja kwani amegombana na meneja wake,” alisema Kaike. Pambano hili limedhaminiwa na Global Publishers, Pepsi na Fore Plan Clinic.