GLOBAL FC KUPASHA MOTO NA VETERANI WA TEGETA

NAHODHA WA GLOBAL FC, PHILLIP NKINI EPAFRA AKIZUNGUMZA MBELE YA WACHEZAJI WA KIKOSI CHAKE.

Timu ya Global FC, keshokutwa Ijumaa inatarajiwa kushuka dimbani kuwavaa Tegeta Veterani katika mchezo wa kirafiki utakaopigwa kwenye Uwanja wa Shule ya Sekondari Tegeta jijini Dar.

Mchezo huo wa kirafiki unatarajiwa kuwa mkali na wa kusisimua kutokana na kikosi cha Tegeta Veterani kuundwa na wachezaji wengi wa zamani akiwemo Kudra Omary aliyewahi kuwika miaka ya nyuma akiwa na kikosi cha Yanga.

Nahodha wa Global FC, Phillip Nkini, alisema kuwa mchezo huo ni kipimo tosha kwa kikosi  chao kutokana na timu wanayokutana nayo kuwa na wazoefu wengi.

“Tunatarajia kupata upinzani katika mechi hiyo kutokana na kuwa tutakutana na watu waliocheza ligi kuu kwa muda mrefu, lakini naamini mchezo huo ni kipimo tosha kwetu kwani kuna mambo mengi tutajifunza kutoka kwao.

“Ni timu ambayo naifahamu, lakini ukweli ni kwamba kila mmoja kwenye timu yetu amejiandaa vyema, hatujawahi kufungwa kirahisi na mechi hii hatutafungwa,” alisema Nkini.