KWIZERA AWATANGULIZA OKWI, KIONGERA, ATISHIA SIMBA ITAKAVYOTISHA

Kiungo mkabaji wa Simba, Mrundi, Pierre Kwizera, amesifu usajili wa kiungo mshambuliaji Mganda, Emmanuel Okwi na Mkenya Paul Kiongera kwenye kikosi chao.

Wachezaji hao walijiunga na timu hiyo hivi karibuni kwa ajili ya kuitumikia Simba kwenye msimu ujao wa Ligi Kuu Bara uliopangwa kuanza Septemba 20, mwaka huu.

Kwizera alisema kuwa kabla ya kutua kwa washambuliaji hao, safu hiyo ya ushambuliaji, haikuwa inafanya vizuri kutokana na kushindwa kutumia nafasi nyingi wanazozipata.

Kwizera alisema anaamini ujio wa wachezaji hao utaimarisha safu hiyo ya ushambuliaji kutokana na uwezo wao mkubwa wa kufunga mabao.

Aliongeza kuwa, wao kama viungo watafanya kazi moja pekee ya kuwatengenezea pasi nzuri zitakazowafikia miguuni washambuliaji hao kwa ajili ya kufunga mabao.

“Kiukweli kabisa ujio wa Okwi na Kiongera umeimarisha safu ya ushambuliaji katika msimu ujao, kabla ya kuja washambuliaji hao, timu ilikuwa inakosa nafasi nyingi za kufunga katika mechi za kirafiki.

“Lakini kutua kwao Simba, hakika kutaisaidia sana timu yetu kutokana na uwezo mkubwa wa kufunga mabao,” alisema Kwizera.