MBEYA CITY YAWEKA MIKAKATI YA KUHAKIKISHA INAZIDI NAFASI YA TATU

Mbeya City inayodhaminiwa na Betri za Magari za RB imepania kuendeleza kasi yake ya msimu uliopita na ikiwezekana kupata zaidi ya nafasi ya tatu, Mbeya City imejipanga kisawasawa.

Msimu uliopita, Mbeya City ilitumia mfumo wa pasi fupifupi na kasi, hali ambayo ilileta ushindani wa hali ya juu kwenye ligi na kufanya kila timu waliyokutana nayo kuhofia.

Ofisa Habari wa Mbeya City, Dismas Ten, alifunguka kuwa, wanajipanga ipasavyo kuhakikisha wanaleta mabadiliko msimu ujao kufuatia kocha kuamua kuachana na mfumo walioutumia msimu uliopita na kuleta mpya pamoja na kuwa na mbinu mpya tofauti na zile zilizozoeleka.

“Msimu uliopita wachezaji walikuwa wakicheza pasi fupifupi kwa kasi lakini safari hii kocha ameamua kuwabadilisha kwa kuachana na mfumo huo na badala yake watatumia pasi ndefu na kwa kasi.

“Kocha anahitaji kuibadili timu ili iweze kuwa katika kiwango kizuri na cha kiushindani zaidi msimu ujao tofauti na jinsi watu walivyoizoea msimu uliopita, kwani kuna washambuliaji wazuri kama Deus Kaseke, Paul Nonga na Mwagane Yeya,” alisema Ten.