STAND UNITED SASA MAMBO KIULAYA, MECHI ZAKE KUPIGWA USIKU KAMBARAGE

Baada ya kufanyiwa marekebisho kwa muda mrefu, hatimaye Uwanja wa Kambarage katika Manispaa ya Shinyanga utakaotumiwa na Stand United msimu ujao, umekamilika na kufungwa taa jambo ambalo litafanya michezo yake kuweza hata kupigwa usiku.

Stand United ambao wameirejesha Ligi Kuu Bara mkoani humo, wanadhaminiwa na Kampuni ya Bin Slum Ltd kupitia matairi bora ya Double Star.

Bodi ya Ligi hivi karibuni ilikamilisha ukaguzi wa viwanja vyake ambavyo vitaanza kutumika rasmi Septemba 20, mwaka huu katika Ligi Kuu Bara huku baadhi ya viwanja vikionekana kutokuwa bora kutokana na kushindwa kukarabatiwa vema, vikiwemo viwanja vya Jamhuri Morogoro na Mkwakwani Tanga.

Mtendaji wa Bodi ya Ligi, Silas Mwakibinga, amesema Uwanja wa Kambarage unaweza kutumiwa katika mechi za usiku kama itabidi kwa kuwa taa zinaruhusu.

“Kambarage naweza kusema ni kiwanja bora kilichorekebishwa vizuri kati ya viwanja vya mikoani vilivyofanyiwa marekebisho, kimekuwa bora katika ‘pitch’ na taa ambazo zimefungwa,” alisema Mwakibinga.