UGUMU, ULAHISI, KAZI YA NGAO YA JAMII YANGA VS AZAM

KIPRE

GUMZO na habari ya mjini hivi sasa ni mechi ya Ngao ya Jamii, itakayowakutanisha wapinzani wakubwa hivi sasa, Yanga na timu inayokuja kwa kasi kuleta mabadiliko ya soka nchini, Azam FC.

Timu hizo zinatarajiwa kujitupa uwanjani kesho Jumapili katika mechi hiyo ya Ngao ya Jamii kama ishara ua ufunguzi wa pazia la msimu mpya wa Ligi Kuu Bara 2014/2015.

Kila timu imefanya usajili wa kutosha katika kukiimarisha kikosi chake pamoja na maandalizi, ikiwemo Yanga kwenda kupiga kambi yake Pemba na Unguja huko visiwani Zanzibar na Azam wakishiriki michuano ya Kombe la Kagame ambapo walitolewa hatua ya robo fainali.

Katika mechi iliyowakutanisha timu hiyo kwenye Ngao ya Jamii msimu uliopita, Yanga walifanikiwa kupata ushindi wa bao 1-0 lililofungwa na kiungo mkabaji aliyetokea kwenye majeraha, Salum Telela.

Wakati Yanga wakiifunga Azam FC katika mchezo wa Ngao ya Jamii, yenyewe ilifanikiwa kuweka rekodi ya kuwafunga katika mechi ya mzunguko wa pili wa ligi kuu mabao 3-2 huku wakitoka sare ya bao 1-1 katika mchezo wa mzunguko wa kwanza.

Katika mechi ya kesho, Yanga wataingia uwanjani wakiwa na kocha wao mpya, Mbrazili, Marcio Maximo anayesaidiana na Leonardo Neiva, Salvatory Edward na Shadrack Nsajigwa ‘Fusso’.

COUTINHO

Wakati Maximo akiwa ni mara yake ya kwanza kukutana na Azam FC, kocha mkuu wa timu hiyo, Mcameroon, Joseph Omog, mwenyewe atakaa benchi akiwa amekutana na timu hiyo mara moja kwenye mechi ya mwisho iliyomalizika kwa sare ya bao 1-1.

Katika mechi hiyo, kila moja inahitaji ushindi ili kujiwekea heshima baada ya msimu uliopita timu hizo kufungana mara moja huku mchezo mmoja wakitoka sare.

Kwa upande wa Maximo mwenyewe anatumia mifumo mitatu, nayo ni 4-4-3, 4-5-1 na 4-3-3, anasema kuwa mechi hiyo ni ‘deby’ kwao kutokana na upinzani uliopo wakati timu hizo zinapokutana.

“Mimi kama kocha sera yangu ni kwamba, ninataka kila timu ikiwa uwanjani nichukue pointi tatu, ninataka kila mechi ushindi ili mashabiki wa Yanga niwape raha.

“Hivyo nitaingia uwanjani kucheza na Azam FC nikiwa na lengo moja pekee la ushindi katika mechi hiyo, ninajua wenzetu wamejiandaa, pia sisi tumejiandaa.

“Kikosi kimeimarika kila sehemu kutokana na kambi tuliyoiweka huko Pemba na Unguja katika kuhakikisha timu inafanya vizuri, ninawaomba mashabiki waje uwanjani kuipa sapoti timu yao,” anasema Maximo.

Kikosi hicho kinaundwa na wachezaji wapya Wabrazili, Geilson Santos Santana ‘Jaja’ na Andrey Coutinho ambao ni hatari katika safu ya ulinzi ya Azam FC, wengine ni Said Juma, Pato Ngonyani na Edward Charles.

Ukiiangalia Yanga, yenyewe imekamilika katika kila safu ya uchezaji kutokana na maboresho yaliyofanywa na Maximo, katika mchezo huo timu hiyo huenda ikamkosa Coutinho kutokana na majeraha ya kifundo cha mguu aliyoyapata kwenye mechi dhidi ya Polisi Dar es Salaam na Jerry Tegete aliyeumia nyonga katika mechi hiyo.

Kukosekana kwa Coutinho ni pengo katika kikosi hicho kutokana na umuhimu wake ndani ya uwanja kwani yumo kwenye First Eleven ya Maximo.

Naye Omog anasema kuwa, ataingia uwanjani kwa ajili ya kazi moja pekee ya ushindi katika mechi hiyo na anaamini kikosi chake kimeimarika kwa ajili ya ushindani katika mchezo huo.

Kocha huyo anatumia mfumo wa 4-4-2 na 4-5-1 ambayo wakati wowote anatarajiwa kuibadilisha kutokana na aina ya mechi.

Usajili wa Azam FC unaundwa na mshambuliaji Mhaiti, Leonel Saint Preux, Didier Kavumbagu na Frank Domayo, wawili hawa walikuwa wanaichezea Yanga msimu uliopita.

Kwa upande wa Domayo, hataicheza mechi hiyo kutokana na kuugua majeraha ya nyama za paja ambayo yamesababisha afanyiwe oparesheni. Mwingine mpya ni Ismail Diara wa Mali.

Katika kikosi cha Azam FC, mchezaji wa kuchungwa ni Kipre Tchetche, Leonel na Kavumbagu kutokana na usumbufu wao ndani ya uwanja, pia uwezo wao wa kufunga mabao.

Vikosi -Yanga: Deogratius Munishi ‘Dida’, Juma Abdul, Nadir Haroub ‘Cannavaro’, Kelvin Yondani, Mbuyu Twite, Simon Msuva, Hassani Dilunga, Geilson Santos ‘Jaja’, Mrisho Ngassa na Haruna Niyonzima.

Azam FC:

Aishi Manura, Erasto Nyoni, Gardiel Michael, Said Morad, Aggrey Morris, Kipre Balou, Abubakari Salum ‘Sure Boy’, Kipre Tchetche, Leonel na Khamis Mcha.