ARSENAL VS MAN CITY NI NGOMA YA KIHISTORIA LEO

Na Saleh Ally

REKODI inaonyesha kwa mara ya kwanza Arsenal na Man City zilikutana Jumamosi ya Desemba 1893 kila moja ikiwa na jina tofauti na lile la sasa.

Man City ilikuwa nyumbani katika mechi hiyo ikijulikana kama Ardwick, ikalala kwa bao moja dhidi ya Arsenal ambayo iliitwa Woolwich. Mechi iliyofuata, City ikalala tena kwa bao moja.

Baada ya hapo timu hiyo kutoka katika miji yenye upinzani mkubwa kisoka ya Manchester na London, zimeendelea kuwa na upinzani mkubwa.

Mechi zao zinawavuta mashabiki wengi kwa kuwa Arsenal haitaki kupoteza dhidi ya timu za Mji wa Manchester, hii ni rekodi ya kila upande kutaka kuonekana unajua sana mpira kuliko mwingine.

Leo kazi inaendelea, ndani ya Uwanja wa Emirates, Arsenal wanakuwa wenyeji na wana rekodi nzuri ya kuifunga Man City mabao mengi wanapokuwa nyumbani.

Mechi ya mwisho zilipokutana katika Ngao ya Jamii, Arsenal iliibuka na ushindi wa mabao 3-0. Hii inaonyesha kufunga mabao mengi zaidi ya hayo inawezekana.

Lakini mvuto na utamu wa mechi unaongezeka zaidi kwa kuwa City hawawezi kukubali kufungwa kirahisi mara mbili mfululizo huku wakijua kulivyo na umuhimu wa kushinda mechi za kwanza za ligi.

Ligi Kuu England, biashara ni asubuhi; ukilala mapema, basi hata kuamka itakuwa shida na mwishoni mwa ligi mambo yanakuwa magumu.

Kila upande una wachezaji nyota ambao wanaweza kufanya matokeo yawe tofauti, mfano Arsenal wakiwa nyumbani, watu kama Jack Wilshere, Santi Cazorla, Mesut Ozil, Alexis Sanchez, Yaya Sanogo na sasa Danny Wilbeck ambaye atakuwa na kazi ya kuonyesha kwamba hakukosea kutua London akitokea Manchester United.

Lakini City shughuli yao ni pevu, Yaya Toure, Jesus Navas, David Silva, Stevan Jovetić, Edin Dzeko, Kun Aguero na bado wana vifaa vingine kibao.

Hivyo ni mechi ambayo itakuwa na ufundi zaidi ukizingatia kila upande una kocha bora, Arsene Wenger wa Arsenal na Manuel Pellegrini wa Man City.

Kila timu ina uwezo wa kubadili matokeo kupitia sehemu nne. Kuanzia kwa makocha ambao ni wazoefu na wajuzi na kila mmoja amewahi kuonja utamu wa ubingwa wa England.

Lakini safu za ulinzi ni imara lakini zina wachezaji ambao wana uwezo wa kufunga mabao ya vichwa kama watapata nafasi ya kona au mipira ya adhabu itakayotupiwa langoni.

Viungo, unaweza ukasema mechi ya leo ni ya viungo. Mechi inayowakutanisha mafundi na bila shaka kila upande utaonyesha uwezo wa juu na hakuna ubishi, mpira utachezwa sana katikati.

Sehemu ya mwisho ni washambuliaji ambao kila upande uko vizuri ingawa kiwango cha ufungaji kwa msimu uliopita, Man City wanaonekana wako vizuri zaidi.

Bado unaweza kuachana na hadithi ya mla jana, halafu ukasubiri leo na kuangalia nani atafanya vizuri zaidi.

Safu hii ya ulinzi itakuwa imara au fowadi gani itatupia zaidi. Hakika itakuwa ni mechi ya burudani.

Tangu 2010:

Wakali hao wamekutana mara tisa tangu msimu wa 2010-11, kati ya hizo saba ni za Premier League moja ya Kombe la Ligi na nyingine moja, Ngao ya Jamii.

Arsenal inaonekana si wababe kwa Man City kwa kuwa katika mechi zote hizo, wameshinda mbili ile ya 1-0 iliyopigwa Aprili 8, 2012 Arsenal ikiwa nyumbani Emirates na ya mwisho ya Ngao ya Jamii ambayo waliibuka na ushindi mnono wa mabao 3-0.

Man City ndiyo wanaonekana kuwa wababe zaidi kwa kuwa katika mechi tisa, wameshinda mechi nne sare ni tatu za mabao 1-1 mara mbili na suluhu.

Kwa kipindi cha miaka yote mitatu, Man City ndiyo wameonekana kuwa wababe zaidi kwa kuwa hata mechi ambayo imekuwa na idadi kubwa ya mabao, wao ndiyo waliibuka na ushindi.

Desemba 14, 2013, Man City iliicharaza Arsenal kwa mabao 6-3 katika mechi ambayo wengi hawakuamini, lakini City walitawala mchezo na kupata mabao mengi zaidi.

Mabao Mengi:

Mechi mbili zilizozikutanisha timu hizo ndiyo zilikuwa zina mabao mengi, moja Arsenal wakishinda na nyingine City nao wakishinda.

Mechi ya kwanza iliyokuwa ina mabao mengi zaidi ni ile ambayo ilikuwa na jumla la mabao 10. Arsenal ndiyo ilishinda kwa mabao 7-3.

Nyingine ambayo ilikuwa ina mabao mengi zaidi ni ile yenye 9, ambayo City walishinda kwa mabao 6-3 dhidi ya wageni wao vijana wa Wenger.

Usisahau mwaka 1956, Arsenal tena ilishinda kwa idadi kubwa kama hiyo ya mabao 7-3 katika mechi ya Ligi Kuu England.

Rekodi zinaonyesha Arsenal inaongoza kwa kushinda kwa mabao mengi zaidi dhidi ya Man City lakini yenyewe imepoteza zaidi.

Maana yake kwa mechi moja, Arsenal ndiyo imetikisa mara nyingi zaidi ngome ya Man City, maana imefunga mabao saba na City kwa mechi moja, mabao mengi zaidi ni sita.

Msimu huu:

Kila timu imecheza mechi tatu tayari katika msimu wa 2014-15 na Man City iko katika nafasi ya nne ikiwa na pointi sita baada ya kushinda mechi mbili na kupoteza moja kwa bao 1-0 dhidi ya Stoke City ambao sasa wamekuwa wababe wao.

Arsenal iko katika nafasi ya saba, nafasi ambayo msimu uliopita ilikuwa na mwenyewe ambaye ni Manchester United.

Arsenal imeshinda mechi moja, sare mbili na haijapoteza. Ina pointi tano ikiwa na maana itapambana zaidi kuongeza idadi ya ushindi na kuzuia kupoteza.

Idadi ya mabao ya kufunga, Arsenal imefunga matano na kufungwa manne, kihesabu safu yao haijakaa vizuri sana kwa kuwa tofauti ya mabao inaonyesha wana uwezo wa kufunga mengi lakini ni rahisi kufungwa mengi pia.

Kwa upande wa City wao wamefunga mabao matano, hii inaonyesha safu yao ya ushambuliaji ina makali sawa na ile ya Arsenal.

Lakini safu ya ulinzi ya City ni ngumu ukilinganisha na ile ya Arsenal kwa kuwa imefungwa mabao mawili tu katika mechi tatu.