WAKATI MWAFAKA, SIMBA IENDELEE KUMPA NAFASI DOGO MANYIKA

ZAIDI ya miaka 13 au zaidi iliyopita nilizungumza na mmoja wa makipa maarufu nchini, nikamuomba kwenda nyumbani kwake kufanya mahojiano kwa kuwa kipindi hicho alikuwa anacheza soka la kulipwa nchini Shelisheli.

Manyika Peter alikuwa amerejea mapumzikoni nyumbani kabla ya kurejea tena Shelisheli kwa ajili ya kucheza soka la kulipwa.

Nilifika kwake Ilala jijini Dar es Salaam, kabla ya kuanza mahojiano, alimuita mtoto wake, sikumbuki kama alikuwa mtoto ambaye aliniambia, halafu nikazungumza naye kuwa anaipenda timu gani, akaniambia na wote tukacheka.

Baada ya kusalimiana na Manyika, nilizungumza na mkewe na baada ya hapo, wao walitupisha nikaanza kufanya naye mahojiano kuhusiana na soka la Shelisheli na maisha nje ya Tanzania hasa kwa mwanasoka yanavyokuwa.

Huna haja ya kujua alichonieleza Manyika au baba Peter kama nilivyosikia anaitwa siku hiyo na mkewe.

Lakini nimelazimika kukumbuka nyuma baada ya kumuona kwa mara ya kwanza mwanaye Peter Manyika akidaka katika mechi kubwa ya Simba dhidi ya Yanga akiwa ndiyo ana umri wa miaka 18.

Hiyo ni rekodi mpya kwa kipa mwenye umri kama wake, hasa ukizingatia nafasi ya kipa mara nyingi inakuwa inaaminika inahitaji wazoefu zaidi angalau kuanzia miaka 25 kwenda juu.

Kinda huyo alipata nafasi baada ya makipa wote wawili kuwa majeruhi. Ivo Mapunda na Hussein Shariff ‘Casillas’ ambao waliumia kwa nyakati tofauti mjini Zanzibar na jijini Johannesburg, Afrika Kusini, Simba ilipokuwa kambi.

Simba kumpa nafasi ndiyo jambo muhimu zaidi, kwa kuwa kulikuwa na uwezekano wa Mapunda kucheza kwa kuwa alikaa kwenye benchi.

Viongozi wa Simba, hasa benchi la ufundi chini ya Patrick Phiri wanastahili pongezi na huenda kwa kiasi fulani jambo hilo linaweza kuondoa imani Friends of Simba (Fos) wamekuwa wakimuingilia kocha.

Kama ingekuwa hivyo huenda kungekuwa na ugumu sana katika kukubali kumpa nafasi kinda huyo aitumikie Simba katika mechi ngumu na muhimu ambayo Simba ilikuwa inataka ushindi wa kwanza kwenye ligi lakini katika mechi yake ya kwanza ya msimu dhidi ya watani wao Yanga waliokuwa wameshinda mfululizo.

Huenda watu wataanza kujifunza kuwa kuna haja ya kuwaamini vijana lakini kuna kila sababu ya kuwekeza kwenye soka la vijana kwa kuwa ndiyo watakuwa wakombozi wa soka yetu baadaye.

Angalia Manyika ambaye amepewa nafasi na moja kwa moja hakuichezea, badala yake aliicheza vizuri na kwa ufasaha mkubwa kama kipa wa siku nyingi kwa kuwa alijiamini vilivyo.

Manyika amecheza kwa kujiamini, ameonyesha ni tegemeo Simba na timu yetu ya taifa hapo baadaye na anapaswa kuendelea kupewa nafasi zaidi ya hiyo ili kukiinua kipaji kingine msaada kwa taifa letu.

Usisahau licha ya kwamba alikuwa akiichezea Simba kwa mara ya kwanza katika mechi kubwa dhidi ya timu kubwa kama Yanga, lakini ndiyo ilikuwa mechi yake ya kwanza ya ligi.

Hakuwahi kucheza Ligi Kuu Bara, hiyo ndiyo ilikuwa mechi yake ya kwanza, halafu ikawa mechi yake ya kwanza dhidi ya Yanga. Haukuwa mzigo rahisi kwake, ndiyo maana baada ya mechi alibaki chini akisali kwa dakika kadhaa.

Hongera Simba kwa kumpa nafasi, hongera kwake yeye kwa kuonyesha vijana ni mhimili na njia, kikubwa hapaswi kuvimba kichwa badala yake anatakiwa kujituma zaidi kuhakikisha anafika mbali zaidi ya hapo.

Mara baada ya mechi, wakati anahojiwa, Manyika alisema baba yake ndiye silaha yake. Neno kubwa na inaonyesha kiasi gani anathamini mchango wake na hiyo ni dalili kuwa akiendelea katika njia sahihi, ana kila sababu ya kufika mbali zaidi.