KIPIGO CHA NYONI KUTOKA KWA MADEREVA BODABODA JICHO LA MAAFA MBELE YETU

MMOJA YA WATU WALIOKUWA KWENYE TUKIO HILO ENEO LA KIJITONYAMA JIJINI DAR ES SALAAM, AKIONYESHA FULANA YA ERASTO NYONI AMBAYE ALIPIGWA SANA NA MADEREVA BODABODA LAKINI AKAFANIKIWA KUKIMBIA AKIWA KIFUA WAZI.

Na Saleh Ally

BEKI Erasto Nyoni wa Azam FC alikumbwa na matatizo makubwa sana, si vibaya kusema anapaswa kumshukuru Mungu na kusali zaidi kwa kuwa amenusurika kifo.

Nyoni alipigwa kama mwizi, huenda kwa wale wanaochukulia neno kupigwa kama ni jambo la kawaida, lakini Nyoni alishambuliwa na watu zaidi ya 40 ambao walimkimbiza huku wakimpiga mfululizo.

Kumtetea ilikuwa haiwezekani, askari mmoja alijaribu, akashindwa. Msemaji wa Yanga, Baraka Kizuguto akiwa na mdau mwingine wa soka, Mucky Zayumba pia waliingilia wakashindwa na wakatishiwa kupigwa, wakaacha.

 

GARI LA NYONI (KULIA), LIKIWA LIMEKWAMA BAADA YA KULIGONGA GARI LA GLOBAL PUBLISHERS INAYOMILIKI GAZETI BORA LA MICHEZO NCHINI LA CHAMPIONI.

Madereva hao wa bodaboda waliokuwa wanampiga Nyoni kama mwizi au jambazi anayetumia silaha, walikuwa wanafanya hivyo kwa kuwa tu alimgonga mwenzao.

Nyoni alimgonga dereva bodaboda katika eneo la Tip Top, Manzese jijini Dar es Salaam akiwa katika mizunguko yake ya kawaida jioni ya Jumatatu iliyopita.

Inaelezwa awali alijaribu kusimama, lakini kundi la madereva hao wa bodaboda waliofika pale walionekana hawana nia nzuri, walilenga kumuumiza. Akachukua uamuzi wa kutimua mbio akipita sehemu mbalimbali ikiwemo Sinza huku akiyagonga magari kadhaa.

 

NYONI (WA PILI KUSHOTO) WALIOSIMAMA AKIWA NA KIKOSI CHA TAIFA STARS.

Nyoni hakuwa kwenye akili yake vizuri, alichanganyikiwa, alionekana alikuwa ni mwenye lengo la kuokoa maisha yake. Hivyo alikuwa tayari kumgonga mtu yeyote, ili mradi ajiokoe.

Hata baada ya kumshika katika eneo la Kijitonyama baada ya kuligonga gari la Global Publishers Limited, aliteremka haraka na kuanza kuwaeleza kwamba hakimbii. Alitaka wazungumze ili aeleze ilivyokuwa hadi ajali ikatokea na alitakiwa kufanya nini kama ni kulipa au kwenda polisi.

Haraka wakamvamia, wakaanza kumpiga, alianguka alipoinuka tena alipigwa mfano wa kibaka ambaye amepatikana na kidhibiti. Wakati wanampiga walisema ameua, lakini uchunguzi baadaye ukaonekana sivyo na wale walisema vile ili kuonyesha wanachofanya ni sahihi.

NYONI (WA TATU KULIA) WALIOSIMAMA WAKIWA NA KIKOSI CHA AZAM FC.

Hata baada ya Nyoni kukimbia, walirudi wakitaka kumpiga abiria aliyekuwa kwenye gari lake. Jiulize yeye aliendesha, au apigwe kwa sababu zipi? Wasamaria wema wakamuokoa kutoka kwa vijana wengi waliojijaza jazba kwa makusudi na wengine wakiwa hawajui hata lililotokea, basi kwa kuwa ni dereva bodaboda, anaona ni sahihi kumpiga kila dereva wa gari anapopata nafasi.

Hapa lengo si kumtetea Nyoni, lakini huenda umefikia wakati Mwenyezi Mungu ametaka kuionyesha jamii ya Watanzania hatari inayokuja mbele yetu kwa kuwa Nyoni ni mtu maarufu, amepigwa hivyo imekuwa ni rahisi kujua kinachoendelea lakini watu wengi wamekuwa wakifanyiwa mambo hayo ya ajabu na madereva bodaboda ambao sasa wamekuwa na nguvu kuliko serikali na wanachukua hatua mkononi wanavyotaka wao.

Pamoja na kazi nzuri inayofanywa na jeshi lake, lakini Kamanda wa Jeshi la Polisi wa Usalama Barabarani, Mohammed Mpinga lazima ajue kuna jambo la kufanya ili kuwahi kuepusha mauaji makubwa yanayoweza kutokea siku zijazo.

Iwapo mtu amegonga, askari wa usalama barabarani wapo, serikali inawalipa mishahara kutumia kodi ya wananchi na hiyo ndiyo kazi yao na wao ndiyo wataalamu wanaoweza kung’amua, waachwe wafanye kazi yao. Sasa vipi madereva bodaboda wawe ndiyo askari, mahakama na sheria?

Wanataka kumpiga kila aliyehusika na ajali ya mwenzao, bila ya kujali kama mwenzao ana kosa au la. Hata kama aliyekosea ni dereva wa gari, vipi wasisubiri askari wafike, au kweli alitaka kukimbia, wamzuie akamatwe halafu aende kituoni, afunguliwe mashitaka na ikiwezekana mahakamani!

Madereva bodaboda wangapi wanafanya makosa makubwa barabarani, mbona madereva wa magari hawaungani na kutaka kuwapiga? Jiulize wapi kinakwenda kizazi cha bodaboda na mwisho wake ni upi!

Nimekuwa nawaza, kwamba kuna siku dereva mmoja wa gari atakuwa amezingirwa anakaribia kuanza kupigwa na hana ujanja wa kujiokoa halafu ana silaha anayoimiliki halali. Sijui atafanya nini?

Ajali zilikuwepo kabla ya kuwepo kwa rundo la bodaboda. Hakuwezi kuwa na barabara kusiwe na ajali na hasa katika jiji kubwa kama la Dar. Kwa nini wengine wawe na uwezo wa kuchukua sheria mkononi, nani aliye juu ya sheria kama hata rais wa nchi hawezi kuwa hivyo.

Najua si madereva bodaboda wote wanafanya hivyo au wanaingia kwenye mambo hayo ya kukurupuka, lakini wako wachache wanaharibu taswira ya wengine ambao ni waelewa na hii ni kawaida katika jamii. Iko siku wataingia kwenye matatizo makubwa, hawatasahau milele.

Kamanda Mpinga na timu yake hawapaswi kulipuuzia hili jambo. Walifanyie kazi, ikiwezekana kutafuta fungu la kuanza kutoa mafunzo kwa madereva bodaboda.

Ikiwezekana kuwaondolea kisaikolojia hisia kwamba wao hawathaminiwi au wanadharauliwa, taswira ambayo naona kwa kiasi kikubwa imekuwa ikijengwa kutoka mashariki kwenda magharibi bila ya utafiti wa kutosha.

Kamanda Mpinga, jambo hili si dogo, siku moja litaleta maafa kwa kuwa kumbuka, hata madereva wa magari wana nguvu pia, siku watachoka kuonewa, halafu itakuwa tatizo. Vizuri hili likafanyiwa kazi kwa njia nzuri ya kufundishana, waandalieni kozi maalum, mkifundisha wachache, watafundisha wenzao.

Lengo liwe ni kujenga Tanzania moja yenye amani, ubora na watu wanaoheshimu kwa dhati sheria ikiwezekana, bila ya shuruti.