DAKIKA 540 SASA, MLIBERIA WA YANGA AENDELEA KUZIONA NYAVU KWENYE 'KIDEO'

Straika wa Yanga raia wa Liberia, Kpah Sherman, mpaka sasa amecheza  dakika 540, ambazo ni sawa na mechi sita za Ligi Kuu Tanzania Bara bila kufunga bao lolote katika kikosi chake hicho.

Sherman alisajiliwa katika kipindi cha dirisha dogo akichukua nafasi ya aliyekuwa mshambuliaji wa timu hiyo, Mganda, Hamis Kiiza, ambaye msimu uliopita alimaliza ligi akiwa na mabao 12.

Katika kikosi cha Yanga ambacho kina washambuliaji wa kigeni wawili pekee, bado wageni ambao ni Sherman pamoja na Mrundi, Amissi Tambwe wanaonekana kusuasua kutokana na kushindwa kutikisa nyavu mara nyingi.

Tambwe mpaka sasa ana mabao mawili, moja alifunga akiwa Simba na moja kwa timu yake ya sasa na wote walisajiliwa kipindi cha usajili wa dirisha dogo msimu huu.