OKWI ACHUKUA UONGOZI KWA WAGANDA WENZAKE LIGI KUU

Huku mzunguko wa pili wa Ligi Kuu Tanzania Bara ukiwa unaendelea, mshambuliaji wa Simba, Emmanuel Okwi, ndiye aliyewafunika Waganda wenzake mpaka sasa kwa kuwa na mabao manne.

Ligi Kuu Tanzania Bara ina wachezaji wengi kutoka Uganda na mshambuliaji huyo ndiye aliyeonekana kuwa kinara wa kupachika mabao.

Katika listi hiyo, kuna wachezaji Dan Sserunkuma (Simba), Lutimba Yayo (Coastal Union) na Simon Sserunkuma (Simba).

Hata hivyo, kwa msimu uliopita mpaka ligi inamalizika, Hamisi Kiiza ndiye alikuwa Mganda pekee mwenye mabao mengi ambapo alitikisa nyavu mara 12.

Okwi ambaye ameanza kuitumikia Simba tangu mwanzoni mwa msimu huu, mpaka sasa ligi ikiwa raundi ya 14, amefanikiwa kufunga mabao manne.

Mshambuliaji huyo kwa sasa anafukuzana na Mganda mwenzake Danny wa kikosi hicho ambaye ana mabao matatu na amecheza mechi sita mpaka sasa.

Kwa upande wa Yayo, yeye ameifungia timu yake bao moja na msimu uliopita alimaliza ligi akiwa na bao moja. Mganda wa Simba, Simon, kwenye michezo sita hajafunga bao hata moja.