AZAM WALIA KUNYONGWA, REFA AMTUKANA KAVUMBAGU

Hans Mloli na Sweetbert Lukonge

KIKOSI cha Azam kimetua nchini jana mchana kikitokea Sudan baada ya kutupwa nje ya El Merreikh ya Sudan kwa jumla ya mabao 3-2, lakini wachezaji wa timu hiyo wamemshutumu vikali mwamuzi kwamba aliwaua waziwazi.

Azam walijikuta wakifungwa mabao 3-0, mawili yakiwa katika dakika tano za mwisho. Awali walikuwa wameshinda 2-0 jijini Dar es Salaam, hivyo walitarajiwa waongeze umakini kulinda mabao yao ugenini.

Championi lilizungumza na wachezaji wawili wa kikosi cha kwanza cha timu hiyo, Mrundi, Didier Kavumbagu na Erasto Nyoni muda mfupi baada ya kutua kwenye Uwanja wa Ndege wa Kimataifa wa Julius Nyerere (JNIA) na kuweka wazi kilichotokea kwenye mechi hiyo na kuelezea masikitiko yao.

Kwa upande wa Erasto alielezea hivi: “Mabao waliyotufunga yalikuwa ya halali tu lakini ishu ilikuwa wanabebwa kwenye baadhi ya matukio muhimu uwanjani, yaani muda mwingine refa anawabeba bila sababu, tukitaka kwenda kufunga wanasema offside wakati muda mwingine ni uongo tu.

“Watanzania tunacheza mpira sana ila tukifika ugenini ndiyo tatizo linapokuwepo yaani kunakuwa na mambo ya ajabuajabu mpaka inafikia hatua hii, ifike hatua na sisi tubadilike na sisi wakija huku iwe ni fitna tu na si ‘fair play’ ndiyo tutafika mbali.”

Kavumbagu naye kwa upande wake akafunguka: “Yaani hakukuwa na fair yoyote ile, refa alionyesha dhahiri kwamba nia yake ni ipi tangu mwanzo wa mechi mpaka mwisho, kuna kipindi tunaenda kufunga, anasema kwamba ni offside, tunachezewa rafu yeye anapeta tu, ila wakiguswa El Merreikh anapiga filimbi.

“Kuna wakati nilichezewa rafu, akapeta, nikamuuliza refa mbona unapeta tu, tatizo nini, akanitukana (tusi halifai kuandikika gazetini), yaani tangu nianze kucheza mpira sijawahi kutukanwa na refa, ndiyo kwanza imenitokea Sudan.

“Halafu wakati tupo mapumziko kwenye vyumba vya kubadilishia nguo, kocha Omog (Joseph raia wa Cameroon) alimsikia kocha msaidizi wa Merreikh anamwambia kwa Kifaransa huyo refa ambaye ni Mzambia kuwa tulielewana mpaka mapumziko tuwe na mabao mawili mbona mpaka sasa moja? Wakawa wanabishana pale.”