KISA ADHABU YA TFF, MRWANDA AWAOMBA RADHI MASHABIKI WA SIMBA

Mshambuliaji wa zamani wa Simba ambaye anakipiga Yanga kwa sasa, Danny Mrwanda, amewaomba radhi mashabiki na wachezaji wa Simba kufuatia adhabu aliyopigwa na TFF kwa kukataa kupeana mikono na wachezaji wa Simba.

Mrwanda aliyewahi kukipiga Long DT ya Vietnam amepigwa faini ya laki tano kufuatia kitendo cha ‘kukwepa’ kupeana mikono na wachezaji wa timu pinzani kabla ya mchezo wakati timu hizo zilipokutana Machi 8, mwaka huu na Simba kuibuka na ushindi wa bao 1-0.

Kanuni zinaeleza ni lazima wachezaji wapeane mikono pamoja na marefarii.

Mrwanda amesema watu wa Simba wasimfikirie kivingine, kwani hakudhamiria, bali alikwenda kunywa maji kabla ya kuanza kwa pambano lakini siyo kuwakwepa.

“Nilishangaa kusikia nimepigwa faini, lakini naomba wasinielewe vibaya, sikudhamiria kuwakimbia, nilikwenda kunywa maji na kocha akawa ananipa maelekezo, niliporudi nikakuta wamemaliza, lakisi siyo kusema niliwakimbia.

“Sikujua kama ni kosa na utaona nilipeana na baadhi yao baadaye. Sina kinyongo na mchezaji yeyote Simba jamani. Ila yote kwa yote nitakubali kulipa maana ni maamuzi yao (TFF) wakubwa,” alisema straika huyo wa zamani wa Polisi Moro.