USIKATAE, SIMBA UKAWA NI MASHUJAA WA SIMBA, SASA ZIKENI TOFAUTI ZENU

UTATA kuhusiana na kundi la mashabiki na wanachama wa Simba kutoka Tawi la Mpira Maendeleo maarufu kama Simba Ukawa umekuwa mkubwa sana, unakumbuka wakati fulani hadi mashabiki wengine walitaka kuwapiga.

Askari Polisi wakafanya kazi ya ziada kuwatoa uwanjani kwa usalama. Basi lao likasindikizwa na kweli wakafanikiwa kutoka kwa usalama.

Mechi iliyofuata, Simba Ukawa walikuwa uwanjani kwa mara nyingine wakiendelea kuishangilia timu yao kwa nguvu zote bila ya woga.

Kumekuwa na taarifa kadhaa ambazo zinaelezwa kuhusiana na Simba Ukawa. Unakumbuka kile kipindi cha sare sita mfululizo? Ilielezwa Ukawa walikwenda kwa “Babu” ili Simba wapate sare saba mfululizo bila ya kushinda.

Hali ile na namna ilivyokuwa ikisambazwa ilisababisha chuki kali baina ya Simba Ukawa dhidi ya mashabiki wengine wa Simba baada ya kuona wenzao wakiwahujumu.

Bado yote hayakuwa na uhakika lakini Ukawa wamekuwa wakisisitiza kuwa lengo lao ni kuishabikia Simba na furaha yao ni kuona inaibuka na ushindi ukiachana na maneno mengine ambayo yamekuwa yakielezwa na watu.

Bahati mbaya imetokea siku chache zilizopita baada ya mashabiki sita wa Simba Ukawa kupoteza maisha wakati wakiwa njiani kwenda kuishangilia Simba iliyokuwa ikipambana na Kagera Sugar kwenye Uwanja wa Kambarage mjini Shinyanga. Baadaye mechi ile iliahirishwa kutokana na mvua kubwa iliyonyesha, sasa inachezwa leo.

Ajali hiyo iliyotokea mkoani Morogoro, imewachukua mashabiki hao sita pamoja na watu wengine watatu ambao walielezwa kuwa ni abiria waliopanda katika basi lile lililoteleza na kuacha njia. Ni huzuni kubwa kwa wapenda michezo na hasa soka.

Kwangu nawachukulia Ukawa waliopoteza maisha au kuumia kuwa ni mashujaa wa klabu ya Simba na wanastahili kuthaminiwa sana na uongozi wa klabu hiyo.

Hao walikuwa ni mashabiki na wanachama ambao waliamua kujitolea mambo mawili makubwa ambayo mwanadamu anaweza kuwa mgumu sana kuyatoa kwa mtu au kitu asichokuwa na mapenzi nacho.

Yanapaswa kuwa mapenzi tena ya dhati kwa mwanadamu kutoa muda wake au fedha zake. Ukawa walifanya hivyo kwa Simba, maana walikubali kuchangisha fedha zao ili wakaishangilie Simba.

Walitaka kuipa nguvu ili iitwange Kagera. Walitoa pia muda wao ambao wangeweza kuutumia kutafuta fedha au kuzihudumia familia zao na kama ni mechi tu basi wangeweza kuishuhudia kupitia Azam TV, kusikiliza kwenye rekodi au kusoma matokeo katika Championi kwa kuwa wanajua ni gazeti la uhakika.

Lakini wakaamua kusafiri wakijua safari ni hatua, tena ni safari ndefu ya zaidi ya saa 12 wakiwa wanahangaika njiani. Ili mradi tu kuisaidia Simba ili ifanye vema. Ndiyo starehe yao, timu hiyo ndiyo amani ya mioyo yao. Lakini Mungu anapanga yake na siku zote ndiye aliye sahihi.

Vifo vyao vinauma kwa wana ndugu na rafiki zao lakini vinapaswa kutuumiza hata wanamichezo na wadau wa mchezo wa soka. Viongozi wa klabu ya Simba pia wanapaswa kuguswa na maumivu yao.

Nimesikia wametoa rambirambi. Linaweza kuwa jambo zuri sana, lakini lazima wajue majemedari wao waliopoteza maisha wakiwa njiani kwenda kuipigania Simba, wana familia. Mfano wazazi, watoto, wake au waume, ndugu na jamaa.

Wanaweza kufanya jambo. Kwangu siamini rambirambi pekee kama fedha inatosha. Kama hawakufanikiwa kufika katika mazishi, basi Simba ina viongozi wengi. Wanaweza kufika nyumbani kwa wahusika na kuzungumza na familia zao.

Sijasema wasomeshe watoto wao, sijasema wahudumie familia zao maana sijui uwezo wa klabu hiyo na viongozi wake. Lakini bado wana uwezo wa kuonyesha upendo zaidi ya hapo na ikiwezekana sasa ndiyo uwe mwisho wa tofauti za Simba Ukawa na Simba.

Mwenyezi Mungu ana yake mengi. Huenda pia alichoshwa na kelele za sehemu hizo mbili. Raha na matatizo huwa ni sehemu mbili za kutatua matatizo yanayowakabiri. Simba wanaweza kutatua matatizo yao sasa na kurejesha upendo uwaongoze.

Mungu azipumzishe kwa amani, roho za waliotangulia mbele ya haki.