HILI SUALA LA SINGANO, MENEJA WAKE PIA NI TATIZO KUBWA KWA KUWA HAKUWA NA MSAADA

KATIKA jambo ambalo limekuwa likipasua kichwa changu kwa wiki hizi mbili bila haa ya kupata jibu, ni hili linalomhusu kiungo wa Simba, Ramadhani Singano ‘Messi’.

Messi na klabu yake ya Simba, wamekuwa katika malumbano yasiyoisha huku kila upande ukisema uko sahihi kuhusiana na mkataba.

Messi anasema mkataba wake unaisha mwaka huu kwa kuwa ulikuwa ni wa miaka miwili, Simba wanasema unakwisha mwakani kwa kuwa ulikuwa ni wa miaka mitatu.

Simba wana uhakika kwa kuwa wana uthibitisho, Messi naye ana uhakika kwa kuwa ana mkataba wake mkononi. Kila mmoja anashikilia msimamo wake kuhusiana na uhakika wa upande wake.

Lakini kumeanza kuonekana walakini kidogo kwa upande wa mkataba wa Messi, kwamba kweli unaonyesha ni miaka miwili, lakini ni kopi, si ule orijino. Jambo ambalo linawafanya Simba watumie nafasi hiyo kuhoji.

Bado Messi hajatoa ufafanuzi wa kutosha kuhusiana na ukweli wa hilo. Kwamba kama kweli ana mkataba orijino, ingawa nilisikia alisema huo ndiyo aliopewa!

Kawaida mikataba inakuwa hivi, wachezaji wanapoingia mkataba na klabu, wanasaini mara tatu kama ilivyo kwa ofisa upande wa klabu. Baada ya hapo unafanyika mgawo mara tatu.

Mgawo unakuwa hivi; klabu, mchezaji na Shirikisho la Soka Tanzania (TFF). Kama ni makubaliano, kunaweza kuwa na kopi maalum kwa ajili ya mwanasheria. Sasa vipi Messi leo ana kopi na si orojino?

Hapa ndipo maswali mengi nimejiuliza bila ya majibu. Kwamba alipewa akaupoteza? Au ameamua tu kuuchakachua?

Pia najiuliza au Simba hawakumpa makusudi wakati anasaini? Kama hivyo ndiyo ilivyokuwa, wao wanafaidika na nini sasa? Kwa kweli kunakuwa na maswali mengi sana.

Messi ni kati ya vijana wenye nidhamu kabisa, ninamfahamu kama wadogo zangu ndiyo maana nimekuwa nina hofu kubwa kwamba amechakachua. Lazima kutakuwa na tatizo katika mkataba wa viongozi wa Simba waliomsainisha, au umakini sehemu fulani.

Najaribu kujiuliza pia, yule meneja wake ambaye tumekuwa tukimsikia akizungumza kwenye vyombo vya habari, vipi alishindwa kumsimamia wakati wa kusaini mkataba. Narudi tena kuangalia, huyo meneja kama alimsimamia, vipi alishindwa kujua umuhimu wa mkataba orijino?

Naanza kuwaza, nikipewa nafasi ya kutangaza adui au tatizo katika hili sakata, basi huyo meneja ni namna moja. Maana hakuwa makini na inawezekana basi hii kazi kaivamia! Kwa nini hawana mkataba orijino? Hakujua, au hajui maana yake? Kama hajui kweli, basi hapaswi kuwa meneja na vizuri akifunga mdomo sasa.

Lakini kwa wale viongozi wa Simba waliomsainisha mkataba Messi, walipaswa kuwa ‘fea’. Walijua ni kijana mdogo ambaye haelewi mambo mengi ya mikataba au kisheria. Hivyo walipaswa kumsaidia na kumpa mkataba wake au kumsisitiza awe nao au kuutunza.

Kweli mtu anaweza akawa hajui, kwa kuwa walikuwa kati ya makinda wa Simba hata kama hawakuanza kumkuza tokea akiwa mtoto. Lakini bado walikuwa na jukumu la kumuelimisha kuhisiana na mikataba na umuhimu wake.

Moja; walitakiwa kuhakikisha wanampa mkataba wake orijino na pili; walitakiwa kumsisititia kuhusiaa na mkataba huo kwamba ni lazima autunze kwa ajili ya baadaye.

Kwa maana ya nyaraka, klabu ndiyo inaonekana iko vizuri zaidi na Messi ana upungufu. TFF wanakutana kesho na pande hizo mbili, ukweli utapatikana. Nina hofu kama Messi ataonekana ameonewa kutokana na upungufu huo.

Hivyo ni wakati mzuri kwa vijana kujifunza na kuelewa umuhimu wa mikataba hiyo kwa kuwa mara zote inakuwa na faida wakati husika, kipindi chote cha mkataba na hata baada ya kwisha kwa mkataba. Hivyo kila anayesaini mkataba, ausome au asomewe na anayemwamini na kuuelewa. Pia awe na kopi yake orijino. Hayo yangefuatwa, sasa kusingekuwa na mgogoro huu wa Singano.