TOTO YAULA, KUPAMBANA LIGI KUU BARA KWA MSAADA WA WATAALAMU KUTOKA UJERUMANI

SEITZ (KUSHOTO), MMOJA WA WATAKAOFANYA KAZI NA TOTO KUHAKIKISHA MAMBO YANAKWENDA VIZURI.

Klabu ya Toto African ya Mwanza imepata neema baada ya kuingia makubaliano na wataalamu wa soka kutoka nchini Ujerumani.

Wataalamu hao watafanya kazi pamoja na Toto kuhakikisha inafanya vizuri na ikiwezekana kuwa klabu bora ya nne baada ya Yanga, Simba na Azam.

Toto African imefanikiwa kurejea Ligi Kuu Bara baada ya kusota nje kwa takribani msimu mitatu.

Kwa mujibu wa Msemaji wa Toto African, Cathbert Japhet, amesema wataalamu hao watatoa ushirikiano katika masuala kadhaa ya kiufundi.

 

KIKOSI CHA TOTO...

“Pamoja na hivyo tunategemea ushirikiano mkubwa kutoka kwa Chama cha Soka Mkoa wa Mwanza na ofisini ya Mkuu wa Mkoa pia.

“Lengo ni kuifanya Toto African kuwa timu ya Wanamwanza kwa faida ya mkoa kwa ujumla na kuachana na ushabiki wa timu za Dar es Salaam,” alisema.

Mmoja wa wataalamu hao kutoka Ujerumani ambao watashiriki katika kusaidia Toto ni Jurgen Seitz.

Imeelezwa, Seitz alikuwa nchini Aprili, mwaka huu na alitembelea jijini Mwanza ambao ni mji dada wenye uhusiano na jiji la Wurzburg wa nchini Ujerumani.