SINGANO ASEMA, MIMI NI MCHEZAJI HURU, AHOJI KAMA WASIPOELEWANA NA SIMBA!

 

MKUTANO WA USULUHISHI KATI YA SIMBA NA MESSI, UKIENDELEA HUKU KUKIWA NA WAWAKILISHI WA TFF NA SPUTANZA.

Kiungo Kiungo Ramadhani Singano ‘Messi’ amesema kwa mujibu wa majadiliano kati yake na klabu ya Simba, sasa ni mchezaji huru.

Messi amesema hayo leo mchana mara baada ya mkutano kati yake na Simba uliosimamiwa na TFF na kuhudhuriwa na Chama cha Wanasoka (Sputanza).

Kikao hicho cha usuluhishi kilifanyika leo katika ofisi za TFF na Katibu Mkuu wa TFF, Mwesigwa Selestine amesema wamegundua mikataba miwili alionao Messi na walionao Simba, ina matatizo.

 

MESSI AKIWASILI TFF, MBELE YAKE NI COLLINS FRISCH, MJUMBE WA KAMATI YA UTENDAJI YA SIMBA.

Lakini Messi alisema hakuwa akielewa vizuri suala la kwamba wakubaliane katika mkataba mpya.

“Kwa mujibu wa mazungumzo ni kwamba mikataba yote miwili imefutwa. Sasa tunatakiwa kujadili mkataba mpya, kama ni hivyo mimi ni mchezaji huru.

“Pia sielewi kuhusiana na suala la pili, mfano tukishindwana na Simba, itakuwaje,” alihoji Messi.

Suala hilo linaonekana kwisha, lakini kumekuwa na utata na Mwesigwa alionekana kushindwa kulifafanya vizuri kama mkataba wa unaoishia mwaka 2015 au ule ulioelezwa kuishiwa mwaka 2016 ndiyo ulikuwa sahihi.

Wanahabari walitaka kujua tatizo lililokuwa kwenye mkataba lilikuwa ni lipi hasa. Lakini bado kulionekana kuwa na ugumu kwa watoa ufafanuzi akiwemo Mwenyekiti wa Sputanza, Mussa Kisoki.

Kushindwa kuelezewa vizuri kwa suala hilo kutoka TFF na Sputanza, pia Messi kuonekana haelewi vizuri kilichotokea, ilisababisha maswali mengi.

Hata hivyo, Mkuu wa Kitengo cha Habari cha Simba, Haji Manara amesema kamati ya utendaji ya klabu huyo inakutana kesho na mwisho itatoa tamko kuhusiana na suala hilo.

Simba imekuwa ikisisitiza kuwa ina mkataba na Messi wa miaka mitatu unaoisha mwaka 2016 lakini yeye anasisitiza alikuwa na mkataba wa miaka miwili na klabu hiyo na unaisha Julai mwaka huu.