YANGA INAWEZA KUWEKA KAMBI NCHINI URENO AU SAUZ

YANGA ILIWAHI KUWEKA KAMBI NCHINI UTURUKI...

Uongozi wa Klabu ya Yanga upo mbioni kutafuta kambi ya siku kadhaa kati ya Afrika Kusini na Ureno kwa ajili ya kujiandaa na msimu mpya wa ligi kuu pamoja na michuano ya kimataifa.

Yanga ambayo ilifanikiwa kutwaa ubingwa wa Ligi Kuu Bara msimu uliopita kwa mara ya 25, ipo katika mchakato wa kufanya usajili kabambe wa kuhakikisha kikosi kinakuwa imara.

Aidha, imeelezwa kuwa timu hiyo itaanza kambi visiwani Zanzibar kwa muda mfupi baada ya kumalizika kwa michuano ya Kombe la Kagame inayotarajiwa kuanza mwezi ujao.

Taarifa za ndani kutoka Yanga zimeeleza, wataanza na kambi ya Zanzibar kwa siku kadhaa kwa ajili ya kujiandaa na Kagame kisha ikimalizika michuano hiyo, wataamua kama kwenda Afrika Kusini au Ureno kwa kambi ya kujiandaa na ligi kuu.

“Timu inaanza mazoezi Jumanne (jana) kwa ajili ya kujiandaa na michuano ya Kombe la Kagame ambapo timu inatarajiwa kwenda Zanzibar kwa kambi ya muda mfupi kisha itarejea Dar kwa ajili ya michuano.

“Baada ya hapo kocha Hans van Der Pluijm atachagua kambi kati ya nchi mbili; Afrika Kusini na Ureno na uongozi utajadiliana na kuona timu iende wapi kwani bado hatujaamua.

“Lengo ni kuhakikisha wanakuwa na kikosi bora kitakachokuwa na ushindani msimu ujao kuanzia ndani hadi nje,” kilisema chanzo hicho.

Alipotafutwa Katibu Mkuu wa Yanga, Jonas Tiboroha kuzungumzia suala hilo, alisema: “Kwa sasa bado hatujapanga mipango yoyote juu ya suala hilo, maamuzi mengine yatakuja baadaye.”