MGOSI ASEMA AKIPEWA KIIZA MTAIPATA HABARI YENU ASEE

Straika mkongwe wa Simba, Mussa Mgosi, ametamka kuwa kama timu yake inataka mabao, basi apangwe na Mganda, Hamis Kiiza kikosini.

Washambuliaji hao wote walijiunga kwenye kikosi cha Muingereza, Dylan Kerr hivi karibuni kwa mkataba wa miaka miwili kuichezea timu hiyo iliyoweka kambi yake visiwani Zanzibar.

Mgosi aliyetokea Mtibwa Sugar baada ya kumaliza mkataba wake pamoja na Kiiza, wote waliifungia Simba bao moja kila mmoja na kuiwezesha kupata ushindi wa mabao 2-1 dhidi ya Kombaini ya Zanzibar juzi Jumatatu kwenye Uwanja wa Amaan, Zanzibar.

Mgosi amesema: “Nimemuona Kiiza akicheza mechi ya kwanza na nimekubali uwezo wake, kama Simba inataka mabao mimi nipangwe namba tisa na Kiiza namba kumi, lazima tufunge.”

Hata hivyo, katika mchezo dhidi ya Kombaini ya Zanzibar, Mgosi hakufanikiwa kucheza pamoja na Kiiza kwani Kocha wa Simba, Dylan Kerr aliwapanga katika vikosi viwili tofauti.

 “Nataka kucheza na Kiiza kutokana na uwezo wake mkubwa alionao ndani ya uwanja, isitoshe ana uzoefu mkubwa na anaweza kutengeneza nafasi za kufunga mabao,” alisema Mgosi.