SABABU YA UCHAGUZI, HANS POPPE AAHIRISHA SAFARI YA KWENDA BRAZIL

Wakati Simba ikiwa kwenye mchakato wa kupata mshambuliaji kutoka Brazil, mchakato huo umepata kikwazo baada ya mwakilishi wa klabu hiyo aliyetakiwa kwenda Brazil kusitisha zoezi hilo.

Mwenyekiti wa Kamati ya Usajili ya Simba, Zacharia Hans Poppe ambaye ndiye aliyetakiwa kusafiri kumfuata mchezaji huyo, amesitisha mchakato wa usajili kutokana na uchaguzi wa urais ambao unatarajiwa kufanyika baadaye mwaka huu.

Hans Poppe ambaye alikuwa asafiri jana Alhamisi, amesema amelazimika kuahirisha safari hiyo kwa kusubiria kujiandikisha kupiga kura ili kupata kitambulisho ambacho kitamwezesha kupiga kura ya kumpata rais wa nchi kuchukua nafasi ya Rais Jakaya Kikwete ambaye anamaliza muda wake wa kuwa madarakani mwaka huu.

“Nilikuwa niondoke leo (jana), lakini nahitaji kupata kitambulisho hicho. Awamu ya kwanza sikujiandikisha, kwa hiyo nimeona iwapo nitaondoka, nitakosa tena kujiandikisha na sitapiga kura. Kwa vyovyote vile safari itakuwa baada ya mchakato huo,” alisema kiongozi huyo.

Uchaguzi Mkuu unatarajiwa kufanyika Oktoba 25, mwaka huu, kuchagua rais, wabunge na madiwani lakini uandikishaji wa vitambulisho unatarajiwa kuanza Julai 16 jijini Dar.

Hans Poppe aliongea kwa kusema: “Tayari kila kitu kimekamilika kuhusu Mbrazili huyo na kilichobaki ni kwenda tu kumalizana naye kulekule na kurejea naye.”