UBORA WA MALAWI WAMPA HOFU KWENYE KOMBE LA DUNIA

Taifa Stars imepangwa kucheza na Malawi katika kufuzu Kombe la Dunia 2018 na nahodha Nadir Haroub ‘Cannavaro’ amesema hiyo si mechi nyepesi hata kidogo na itahitajika nguvu ya ziada kuvuka kizingiti hicho.

Mchezo wa kwanza wa timu hizo utafanyika Oktoba 5 kisha marudiano Oktoba 13, mwaka huu na mshindi atacheza na Algeria katika hatua inayofuata.

Cannavaro amesema wana kibarua kizito katika mchezo huo kwani anaijua Malawi jinsi ilivyo na wachezaji makini na isionekane kama timu rahisi.

“Mechi ya Malawi si nyepesi tena, wale jamaa wapo vizuri si wa kuwachukulia wepesi, lakini hata kama tutapita hapo, bado kuna kazi nzito sana kwa Algeria,” alisema Cannavaro.

“Lakini tutapambana ingawa kwa sasa hizo mechi sijaziweka sana kichwani mpaka tutakapomaliza hii michuano ya Kombe la Kagame,” aliongeza Cannavaro ambaye pia ni nahodha wa Yanga.