YULE MZUNGU ALIYESHINDWA AZAM, KESHO ANAKWWENDA ZAKE KWAO

Yule kiungo aliyekuja kufanya majaribio Azam FC, Ryan Burge raia wa Uingereza, kesho Jumanne anatarajiwa kurejea kwao baada ya kushindwa majaribio.

Iwapo kiungo huyo angefuzu katika majaribio yake, angekuwa raia wa pili wa Uingereza kucheza Ligi Kuu Bara baada ya Kally Ongala aliyewahi kucheza Yanga na Azam FC.

Azam ilionekana kuwa katika hatua za kumsajili Burge lakini ikafuta mpango huo na nafasi yake ikachukuliwa na straika Mkenya, Allan Wanga aliyesajiliwa kutoka El Merreikh ya Sudan.

Burge, alisema anaondoka kesho Jumanne kurejea England ambako amesema kuna timu inayomuhitaji hivyo atajiunga atakapofika.

“Natarajia kuondoka Jumanne (kesho) kurejea nyumbani kwa sababu mambo yangu hayakuweza kufanikiwa hapa, lakini huko kuna timu imeonyesha nia ya kunitaka na tayari tumefanya mazungumzo ya awali.

“Sijakata tamaa na soka la Tanzania kwani nimepanga kurejea tena siku yoyote iwapo itatokea timu nyingine ya hapa ikinihitaji kwani nimevutiwa na mazingira niliyoyakuta Azam licha ya kushindwa kusajiliwa,” alisema Burge.