JUMA KASEJA AANZA KUWAPA MAUJANJA MBEYA CITY

Kipa mpya wa Mbeya City ya jijini Mbeya, Juma Kaseja, ameibuka na kuipa mbinu timu yake hiyo kwa kusema kuwa ili waweze kufanikiwa kufanya vyema msimu ujao, wanahitaji kuunganisha nguvu zao pamoja, kuanzia wachezaji, benchi la ufundi na mashabiki wa timu hiyo.

Kaseja amesajiliwa Mbeya City hivi karibuni kwa mkataba wa miezi sita kwa dau la shilingi milioni sita ambapo mchezaji huyo hakucheza ligi yote msimu uliopita, baada ya kuondoka Yanga.

Kaseja alieleza kuwa, ujio wake katika timu hiyo siyo kuwa ndiyo utamaliza tatizo kwa kuisaidia timu hiyo kufanya vyema, kwani timu haichezwi na mchezaji mmoja kisha kuleta mafanikio na kudai kuwa ushirikiano ndiyo utakaoisaidia kujiweka vizuri.

“Timu haichezwi na mtu mmoja, bali inachezwa na watu wote, siyo kuja kwangu ndiyo kutamaliza kila kitu, isipokuwa kinachotakiwa ni ushirikiano kuanzia wachezaji, viongozi pamoja na mashabiki wote wa Mbeya City.

“Hata akiletwa Messi (Lionel) kuja kucheza kutokana na ubora wake, hawezi kufanikiwa bila ya kuwa na ushirikiano wa kutosha na wachezaji aliowakuta.

“Hivyo naamini tukishirikiana kwa pamoja tutaisaidia timu yetu kuweza kufanya vyema msimu ujao,” alisema Kaseja.