PLUIJM AAMUA KUKOMAA NA WASHAMBULIAJI WAKE

Kweli Yanga imepania kutetea kombe lake, kwani zikiwa zimebaki siku 12 kabla ya Ligi Kuu Bara kuanza kutimua vumbi, Kocha wa Yanga, Mholanzi, Hans van Der Pluijm, ameamua kuifungia kazi safu yake ya ushambuliaji baada ya kuridhishwa na mabeki katika mechi kadhaa za kirafiki walizocheza.

Safu ya ushambuliaji ya Yanga, inaongozwa na mastraika watatu matata; Malimi Busungu, Amissi Tambwe na Donald Ngoma.

Yanga inatarajia kuanza ligi kuu kwa kuvaana na Coastal Union ya Tanga katika Uwanja wa Taifa ambapo hadi sasa imeshacheza mechi kadhaa za kirafiki na kutofungwa.

Chanzo cha kuaminika kutoka Yanga kimeeleza kuwa, Pluijm yupo katika mpango wa kuhakikisha anawanoa washambuliaji wake katika suala zima la umaliziaji kutokana na safu hiyo kuonekana kuwa na tatizo kwenye umaliziaji.

“Timu inajiandaa na ligi ambapo kocha Pluijm ameamua kuanzisha programu maalumu kwa ajili ya kuwaweka fiti washambuliaji kwa kufanya ‘effort’, kwani timu imekuwa ikishambulia kwa masaa mengi na kwa harakaharaka bila ya kufunga, hivyo kwa sasa ndiyo kazi anayoifanya.

“Kwa upande wa safu ya ulinzi, ameridhika nayo kutokana na timu kutofungwa katika mechi nyingi za kirafiki tulizocheza, isipokuwa kuna makosa madogomadogo yanayohitaji kurekebishwa kabla ya ligi kuanza.

“Ameeleza kuwa anahitaji wachezaji aliobaki nao waweze kuimarika zaidi kwa kuwa ana imani kuwa waliokuwa katika timu za taifa wakirejea watakuwa fiti,” kilisema chanzo hicho.

Straika aliyeifungia Yanga mabao 13 kwenye Ligi Kuu Bara msimu uliopita, amezungumza na Championi Jumatatu akiwa Burundi alikokwenda kwa ajili ya kuitumikia timu yake ya taifa. Amesema Pluijm aliwaambia mastraika wote msimu ujao anataka ashuhudie mabao ya kutosha.

 “Kwa sasa nipo Burundi na timu yangu ya taifa ila kuna jambo ambalo kabla ya kuja huku, kocha Pluijm alituambia washambuliaji wote kwamba tuongeze umakini kwani hafurahishwi kabisa na idadi ya mabao tunayofunga kwa sasa.

“Kutokana na hali hiyo, ametuambia kuwa, kila mshambuliaji anatakiwa kuwa makini na kucheza soka kwa faida ya timu na faida hiyo ni kufunga mabao mengi, jambo ambalo anaamini kabisa kuwa tunaweza kulitekeleza,” alisema Tambwe.

Tangu Yanga ilipoanza maandalizi yake ya kujiandaa na msimu ujao wa ligi kuu kwa kucheza mechi mbalimbali za kirafiki na zile za michuano ya Kombe la Kagame, safu hiyo ya ushambuliaji imeshazifumania nyavu mara 21 katika mechi 11.  Mabao 15 kati ya hayo, yamefungwa katika mechi za kirafiki.

SOURCE: CHAMPIONI JUMATATU