SIKU CHACHE KABLA YA MSIMU MPYA KUANZA, MWADUI FC YA JULIO INA MAJERUHI KUMI

Wakati kikosi cha Mwadui FC kikiendelea na maandalizi, kimeendelea kukumbwa na majeruhi ambao sasa wamefikia kumi na wengi wakiwa kikosi cha kwanza.

 Wachezaji hao ni pamoja na David Luhende, Athuman Idd ‘Chuji’, Jamal Mnyate, Shaban Kado, Jabir Aziz ‘Stima’, Antony Matogolo, Junior na wengine wengi.

Kocha mkuu wa timu hiyo, Jamhuri Kihwelo ‘Julio’, alifunguka kuwa, anaamini wachezaji wake watarejea kwenye afya njema.

 “Wachezaji wangu takriban kumi ni majeruhi lakini ninaendelea na michezo ya kirafiki kwa sababu wapo wachezaji wengine, japo hakuna anayependa kuumia, siku zote inatokea bahati mbaya.

“Wengi tayari afya zao zimeanza kuimarika kwa kiasi na wote wamepata majeraha hayo kipindi hiki cha maandalizi kupitia michezo ya kirafiki,” alisema Julio ambaye ametangaza kuwa kikosi chake kipo tayari kupigania ubingwa msimu huu.

Ikumbuke kuwa tayari timu hiyo imecheza michezo saba na timu za ligi kuu zikiwemo Simba, Azam, Kagera Sugar, Stand United, Toto Africans, Coastal Union, African Sports, JKT Ruvu na inatarajiwa kucheza na Mtibwa Septemba 6, mwaka huu.