ATAKAYEKWENDA NA MATOKEO YAKE MFUKONI TAIFA KESHO, AJUE AMEUMIA…

Na Saleh Ally

KESHO ndiyo ile siku kila mpenda soka nchini alikuwa akiisubiri kwa hamu pale kwenye Uwanja wa Taifa jijini Dar es Salaam.

Wapo watakaokaa kimya nyumbani wakitaka kuiona mechi hiyo moja kwa moja kupitia runinga ya Azam TV ambayo huonyesha mechi za Ligi Kuu Bara.

Lakini wapo ambao hawatakubali, watahakikisha wanafika Uwanja wa Taifa ili waishuhudie wakiwa pale uwanjani. Hao ni wale wenye nafasi ya kufanya hivyo.

Mechi ya Simba ambao watakuwa wenyeji wa watani wao, Yanga, itakuwa na mvuto sana na inawezekana ikashuhudiwa na watu wengi zaidi kuliko mara nyingine kutokana na mvuto huo.

Ushindi wa kila timu katika mechi tatu za mwanzo za Ligi Kuu Bara ndiyo umeongeza mvuto zaidi wa mechi hiyo ya kesho.

Kwa maana ya takwimu kupitia mechi tatu ambazo kila timu imeishacheza, jibu linaonekana kuwa hivi, itakuwa ni mechi ya ushindani wa juu na matokeo ambayo si rahisi kubashiri kirahisi.

Ukiangalia uwezo wa Simba na Yanga kwa maana ya uwanjani, hauna tofauti kubwa sana. Yanga wamefunga mabao 9, Simba wamefunga 6 na kila timu imefungwa bao moja tu.

Zote mbili zilianza kushinda na mabao ya idadi ndogo, halafu zikaenda zinaongeza idadi ya mabao ya kufunga. Simba ilianza na bao moja, hadi mechi ya tatu ikashinda mabao 3-1. Yanga ilianza na ushindi wa mabao mawili, hadi mechi ya tatu ikawa imeshinda mabao 4-1.

Kwa takwimu hizo, ni hatari sana kwa shabiki yeyote kwenda uwanjani akiwa na matokeo yake kichwani, kwenda na matokeo mfukoni, haitakuwa sahihi.

Simba vs Yanga, Uwanja wa Taifa, kesho ni mechi ambayo timu yoyote inaweza kushinda, timu yoyote inaweza kupoteza na pia kuna uwezekano wa sare.

Kwa yeyote anayekwenda uwanjani, anatakiwa kwenda kiuanamichezo zaidi. Akili yake aielekeze kwenye hili; kwamba ni mchezo wa soka ambao timu yoyote inaweza kushinda, kupoteza au kukatokea ahueni ya sare.

Mara kadhaa, tumeona mashabiki wanazimia pale uwanjani na hii inatokana na mashabiki wengi kwenda uwanjani wakiamini timu fulani ndiyo yenye uwezo mkubwa wa kushinda kuliko nyingine, jambo ambalo si sahihi hata kidogo.

Mfano, mashabiki wa Simba, wamekuwa wakiamini Yanga ni wepesi sana kwao. Bado wanapaswa kujua Yanga ya sasa ina mabadiliko makubwa na ina wachezaji wanaoweza kubadilisha yale yaliyozoeleka hapo awali.

Kuna la kukumbuka kuhusiana na mchezaji mmojammoja ambao Yanga na Simba wanao. Kwamba ni wachezaji wanaoweza kubadili matokeo kwa kupitia uwezo au vipaji vyao.

Wachezaji ambao wakati mwingine bila ya mfumo wa kocha, wanaweza kufanya mambo tofauti kabisa na kushangaza.

Nitakukumbusha, mechi ya mwisho ambayo Simba iliibuka na ushindi wa bao 1-0 dhidi ya Yanga, utaona lile bao alilofunga Emmanuel Okwi.

Bao la Okwi halikuwa la mfumo tena, badala yake kipaji na uwezo mkubwa au kipaji cha juu cha mchezaji, ndicho kilichoamua matokeo ya mechi ile.

Maana yake, Amissi Tambwe, Donald Ngoma, Simon Msuva, Haruna Niyonzima kwa upande wa Yanga, Hamis Kiiza, Said Ndemla, Ibrahim Ajibu, Mussa Hassan Mgosi na wengine, pia wanaweza kuamua matokeo ya kesho.

Sasa kwa wale wanaokwenda uwanjani, ili kuepusha ghadhabu zisizokuwa na msingi au kuepusha watu kuzimia au kupata matatizo, lazima wajue ni mechi ambayo matokeo yanaweza kuwa mabaya au mazuri kwa upande wowote.

Simba na Yanga, kesho, hata kama unaangalia kwenye runinga, basi hakikisha kwamba matokeo yatapatikana baada ya dakika 90, yale ya kichwani mwako au mfukoni, achana nayo, yatakuumiza.