KOCHA WA SIMBA, WALA HANA HOFU HATA KIDOGO KUHUSU YANGA

Kocha Mkuu wa Simba, Muingereza, Dylan Kerr, ameonekana kutokuwa na wasiwasi kabisa na mchezo wa kesho Jumamosi dhidi ya Yanga kwa jinsi anavyowafanyisha mazoezi wachezaji wake.

Katika mazoezi ya Simba yaliyofanyika jana asubuhi kwenye Uwanja wa Amaan visiwani hapa, kocha huyo muda wote alionekana mtu mwenye furaha kwa wachezaji wake, tofauti na makocha wengine wanapokuwa kwenye maandalizi ya mechi kubwa kama hiyo, hali ambayo inaonyesha wazi ana uhakika kuwa kile anachokielekeza kinafanyiwa kazi.

Licha ya hayo yote, lakini kocha huyo ambaye ni rafiki wa kila mtu, alikuwa akiwapa moyo wachezaji wake pindi wanapokosea maelekezo yake kwa nia ya kutowakatisha tamaa na kuwatoa mchezoni kuelekea mechi hiyo ambayo ina presha ya hali ya juu.

Kwa upande wa wachezaji, nao walikuwa ni wenye furaha muda wote na kujisahaulisha kabisa mechi hiyo kwani hakuna hata mmoja aliyekuwa akionekana mwenye kuifikiria kwa jinsi walivyokuwa wakionekana.

SOURCE: CHAMPIONI