PLUIJM AZITAKA POINTI TISA MAPEMAA KABLA YA KUKUTANA NA SIMBA

HIKI NDIYO KIKOSI CHA KWANZA CHA YANGA 2015 KUANZA KUCHEZA MECHI YA KWANZA YA LIGI KWA MSIMU WA 2015-16.

Baada ya kucheza mchezo mmoja dhidi ya Coastal Union ya Tanga jana Jumapili, Kocha Mkuu wa Yanga, Mdachi Hans van Der Pluijm, ametamka kuwa, ameandaa mipango madhubuti ya kuhakikisha kikosi hicho kinashinda michezo yake mitatu iliyobaki kwenye Uwanja wa Taifa, Dar kabla ya kuanza kuzunguka mikoani kusaka pointi.

Keshokutwa Jumatano, Yanga itacheza na Tanzania Prisons, kisha JKT Ruvu kabla ya kucheza na Simba Septemba 26. Pluijm amejipanga kushinda mechi hizo za Uwanja wa Taifa mapema kabisa kabla ligi haijachanganya.

   

Pluijm ambaye ni kocha wa zamani wa timu ya Berekum Chelsea ya Ghana, amesisitiza kuwa  ni lazima kikosi chake kuhakikisha kinaibuka na pointi hizo katika uwanja wa nyumbani ambazo zitakisaidia katika harakati za kutetea ubingwa.

 “Tumeweka mipango ya kuhakikisha hatupotezi hata mchezo mmoja ambao tutacheza katika Uwanja wa Taifa katika michezo yetu minne ya awali (ukiwemo wa jana) ambayo tutachezea katika uwanja huo.

“Pointi hizo ni muhimu kuzipata kwa ajili ya kuweza kutusaidia katika harakati zetu za kutetea ubingwa ambapo tunawaambia wapinzani wetu wajiandae vizuri, kwa sababu tunakuja,” alisema Pluijm.