Baada ya Simba kuvunja mwiko kwa kuibuka na ushindi katika Uwanja
wa Mkwakwani, mshambuliaji na nahodha wa kikosi hicho, Mussa Hassan Mgosi,
ametamka kuwa wataendelea na moto huo wa ushindi pia katika mchezo wao wa keshokutwa
Jumatano dhidi ya Mgambo JKT ili kuzidi kujiweka katika nafasi ya kutwaa
ubingwa.
Kikosi hicho cha Simba mwishoni mwa wiki iliyopita, kiliibuka na
ushindi wa bao 1-0 lililofungwa na Hamis Kiiza dhidi ya African Sports. Huo
ulikuwa ni ushindi wa kwanza kwa timu hiyo katika Uwanja wa Mkwakwani baada ya
kupita misimu mitatu.
Mgosi ambaye ni mshambuliaji wa zamani wa timu ya DC Motema Pembe
ya Congo, amesema, kuwa baada ya kuibuka na ushindi huo, sasa wanajiamini na
wanaamini hakuna atakayeweza kuwazuia wasipate pointi tatu dhidi ya Mgambo JKT.
“Kwa sasa tunajiandaa vyema zaidi kwa ajili ya kuhakikisha
tunapigania pointi tatu katika mchezo wetu wa Mgambo JKT.
“Wachezaji wote tuna hali ya kujituma ili kupigania ushindi kwa
mara nyingine na kukusanya pointi nyingi katika michezo ya awali ambazo
zitatusaidia katika kufikia lengo letu la kutwaa ubingwa, baada ya kupita kwa
misimu mitatu bila kombe hilo,” alisema Mgosi.
0 COMMENTS:
Post a Comment