AJABU, HIVI SIMBA HAIPO BILA YA HAMISI KIIZA?

Na Saleh Ally

MSHAMBULIAJI Mganda, Hamisi Kiiza alikuwa majeruhi. Akalazimika kukaa nje ya uwanja kwa dakika 180 wakati Simba ikipambana.

Simba ilicheza dhidi ya Mbeya City na kushinda kwa bao 1-0, Kiiza akiwa amekaa benchi. Mechi iliyofuata, nayo kwenye Uwanja wa Sokoine, Simba ikalala kwa bao 1-0.

Wakati Simba inapoteza mechi yake dhidi ya Prisons, Kiiza alikuwa anakamilisha dakika 180 nje ya uwanja. Wakati huo tayari akiwa na mabao matano aliyofunga katika mechi sita alizokuwa ameichezea Simba.

Maana yake Kiiza amecheza mechi 6 na kufunga mabao 6 akiwa na wastani wa bao moja katika kila dakika 90 ambao ni sehemu ya wastani bora zaidi msimu huu.

Kiiza ni kati ya washambuliaji wenye uzoefu na Ligi Kuu Bara kwa kuwa amecheza Yanga misimu mitatu, hali inayomfanya awe na uzoefu wa ligi hiyo.

Sasa jiulize kuhusiana na Simba na safu yake ya ushambuliaji. Kwamba bila ya Kiiza, hakuna Simba inayofanya kweli.

Asipofunga Kiiza, hakuna mshambuliaji yoyote wa Simba anayeweza kufunga. Iwe ni mgeni au mzalendo hakuna anayeweza kutoa msaada kwa kikosi hicho.

Kiiza amefunga mabao sita kati ya tisa ya Simba. Mengine yamefungwa na viungo, Justice Majabvi, beki Juuko Murishid na mzalendo pekee aliyefunga bao la Simba msimu huu hadi sasa, Joseph Kimwaga.

Mganda huyo amekaa nje, Simba ikashinda kupitia bao lililofungwa na beki. Mechi iliyofuata washambuliaji hawakufunga tena na wakapoteza kwa bao 1-0 dhidi ya Prisons.

Kiiza amerejea, washambuliaji au viungo wengine hawakufunga tena. Hadi Kiiza amefunga na kuipa Simba pointi tatu nyingine, sasa imepanda hadi nafasi ya nne ikiwa na pointi 18!

Wengine wako wapi? Wanafanya nini na kwa nini hawafungi? Au ndani ya Simba kuna tatizo linalofanya wasiwe katika kiwango kizuri?

Mfano inawezekana hata wanaocheza hawana furaha. Kwani inawezekana tukawalaumu wachezaji lakini kuna kitu kinawakera au hawana furaha. Kama ni hivyo, wanapaswa kumalizana na uongozi au kusema hadharani maana lawama zitaendelea kudondoka kwao kwa kuwa kufunga si jukumu la uongozi.

Kwa uongozi kama kuna tatizo, mfano kuchelewa kwa mshahara au kuna mfarakano wa chinichini kati ya wachezaji basi kuna kila sababu ya kuumaliza.

Hivi karibuni nimesikia wachezaji wa Simba wakiwa kambini walitaka kuzichapa. Najiuliza kwa nini ilikuwa hivyo na ugomvi ulilenga kipi hasa?

Kama ungekuwa ni ugomvi wa uwanjani ungesema ni presha ya mchezo. Lakini wanapogombana kambini, basi kuna shida na hili ni jukumu la uongozi kulishughulikia hili suala la kwa uhakika ili kurejesha hali ya amani na upendo.

Hakuna mafanikio sahihi katika sehemu yoyote kama hakuna upendo. Kawaida upendo unasimamiwa na uongozi na viongozi wengine ndani ya timu, mfano benchi la ufundi ambalo linaongozwa na Mwingereza Dylan Kerr.

Mwisho nikumbushe, uongozi wa Simba kupitia kamati zake za usajili, ufundi na ile kubw ya utendaji lazima wakubali kwa mara nyingine wamechemsha katika usajili na hasa safu ya ushambuliaji.

Safu ya ushambuliaji ya Simba si hatari na inatembelea nyota ya Kiiza. Hivyo ni kufanya maamuzi magumu na ikiwezekana kuisafisha kabisa au kufanya mabadiliko makubwa na upembuzi wa nini kifanyike lazima uwe umeanza sasa na si kusubiri hadi mwishoni halafu wakurupuke tena, mwisho ndiyo kuangukia kwa watu kama akina Pape N’daw ambao wanakwenda uwanjani wakiwa na ‘power bank’ lakini bado hawana msaada wowote zaidi ya kuwatia aibu na kuanzisha vichekesho tu!