NDANI YA SIMBA KUNA TATIZO NA LAZIMA VIONGOZI WAJIPIME

Na Saleh Ally

KUMEKUWA na mambo mengi sana yanazungumzwa kuhusiana na kikosi cha SImba kinachoshiriki Ligi Kuu Bara na kwa hali ya ushabiki inaonekana kwamba hakina mwenendo mzuri.

Maneno kutoka kwa mashabiki, baadhi ya viongozi na hata wachezaji wenyewe yamekuwa yakisigana kuonyesha hakuna mwelekeo ambao ni sahihi.

Taarifa za kwamba baadhi ya viongozi wameitenga timu hasa baada ya kipigo cha Yanga cha mabao 2-0, baadaye ikaelezwa walifanya hivyo mara baada ya kipigo cha bao 1-0 kutoka kwa Prisons.

Kocha Dylan Kerr alishatamka wazi kwamba anaona ni bora kuondoka zake kwa kuwa mwenendo ndani ya kikosi haumfurahishi. Inawezekana ni woga wa ajira ndiyo maana hakutaka kusema kila kitu wazi, lakini inaonekana kutakuwa na shida kati yake dhidi ya uongozi.

Uchunguzi wangu wa kawaida tu, tayari nimegundua ndani ya kikosi cha Simba kuna makundi ambayo yanatokana na watu ambao wako ndani ya timu kama sehemu ya uwakilishi wa baadhi ya viongozi.

Kwamba ndani ya kikosi cha Simba, wao kazi yao kubwa ni kupeleka maelezo kwa baadhi ya viongozi nini kimefanyika na kuchukua maelekezo nini kifanywe.

Baadhi ya kazi za watu hao, baada ya kupeleka mrejesho ya walichokiona ndani ya timu, hupewa maelekezo yakiwemo kama yale ya hivi; fulani acheze na fulani asicheze na hapa sasa yanakuwa tena si matakwa ya kocha na badala yake, kiongozi fulani anataka nini.

Najua, Watanzania wengi hawapendi kukosolewa na wepesi sana kuukanusha ukweli kwa kuwa hawaupendi lakini Simba inaweza kuwa na kocha bora, lakini baadhi ya viongozi wakageuka tatizo na kuwaangusha wenzao.

Au viongozi hao wanaweza kugeuka tatizo na kuiangusha Simba yote ambayo ndani yake kuna juhudi ya watu wengi sana, hata wale tu wanaokaa jukwaani kuishangilia, kumbuka hupoteza fedha zao, muda wao na nguvu wanazotumia kuipa morali timu yao kwa kuishangilia.

Kumekuwa na msigano mkubwa ndani ya kikosi cha Simba kama vile baadhi ya watu kutaka kumuonyesha kazi Kerr na wako wanaofanya hivyo kwa kuwa hawaridhiki kitu lakini kwa kuwa wana nguvu kutoka kwa viongozi au baadhi ya viongozi.

Ukiangalia, tayari misimu mitatu Simba imekwenda bila ya kufanya vizuri ikiwa imeajiri na kuacha makocha lundo ikiwezekana bila sababu ya msingi.

Huenda kocha angeonekana mbaya sana kwa kuwa hakuwa tayari kumsikiliza kiongozi fulani tena asiye rais wa klabu ya Simba. Badala yake ni mjumbe wa kamati ya utendaji tu anayeamini anapaswa kusikilizwa.

Sasa ni wakati mwingine Simba imeingia kwenye njia hiyo ya kuanza kuamini kwamba kocha hafai kwa kuwa timu ilikuwa imecheza mechi 8 na kupoteza mbili. Jambo ambalo kokote kule katika soka duniani, haliwezi kukubalika pia ni kichekesho cha karne.

Uongozi unajua, kwamba hata katika usajili wao kuna mengi ya kurekebisha. Uongozi unajua wakati mwingine kutokana na matatizo ya kifedha kuna mahitaji kadhaa walishindwa kufikisha kwa wakati mwafaka iwe kwa wachezaji au makocha lakini wakavumiliwa.

Ajabu wao kwa nini hawawezi kuvumilia hata kidogo? Vipi wakikosea wengine ionekane ni tatizo kubwa sana wakati hata wao viongozi wanakosea na inaonekana si tatizo!

Rais wa Simba, Evans Aveva, Ijumaa iliyopita alijitokeza mazoezini kwa kushitukiza. Si jambo baya sana, kwa kuwa alitaka kuwaonyesha yuko makini na anajali lakini hilo haliwezi kuwa jibu la kila tatizo la Simba, badala yake utimizaji wa mahitaji ya kikosi.

Lakini asisahau mambo mawili; hamasa kwa wachezaji kwa kuwa nao ni bindamu, hata kama ni kuwasisitiza kujituma, kuna njia sahihi za kuzitumia. Pili; kusimama kwa rais wa klabu na si kila mmoja awe na sauti kwenye kila kitu, jambo ambalo haliwezi kuwa sahihi na litaiangusha Simba.