KARIBU TENA BRAZA KIONGERA, LAKINI SIMBA NAO LAZIMA WAJUE BILA HIVI, NAWE UTAFELI

Na Saleh Ally

MISIMU mitatu mfululizo, Simba imekuwa katika kipindi kigumu ambacho huenda kinazidi kuwafanya mashabiki na wanachama wengi wa klabu hiyo kuwa na maswali mengi yasiyokuwa na majibu hata nusu yake.

Kuna mambo mengi yanayofanya mashabiki hao wa Simba kuwa na maswali yasiyo na majibu, lakini kinachoumiza zaidi ni kuona ile sifa ya ukali unaonekana na neno Simba, haupo tena!

Nani anaweza kucheza na Simba, aungurumapo Simba, mcheza nani? Safari hii inaonekana hata akiunguruma, wachezaji lundo na wala hawana hofu hata kidogo, hii ni Simba kweli?

Hilo ni swali ambalo wanajiuliza Wanasimba wengi sana, lakini bado wanakuwa na matumaini kwamba mambo yatawezekana kabisa kwa kuwa ukweli, Wanasimba wanasifika kwa kuwa na uvumilifu, angalau.

Hakuna ubishi kuwa hawatavumilia kwa miaka mingine mitatu ijayo kama hali itakuwa hivi; kwamba Simba ina timu inayoshindwa kushika hata nafasi ya pili kwa misimu mitatu sasa.

Siti ya Simba, imekaliwa na Azam FC, maana isipokuwa bingwa inashika nafasi ya pili. Wanaobadilishana kileleni sasa wamekuwa Azam FC na Yanga.

Simba inaendelea kupigania nafasi zinazofuatia ni maumivu kwa Wanasimba na huenda wangefurahi msimu huu mambo yakabadilika na warejee katika nafasi hizo mbili bila ya kujali ni ubingwa au nafasi ya pili.

Safu ya ushambuliaji ya Simba msimu huu, imeendelea kuwa tatizo licha ya kwamba ndani ya mechi 9 imefanikiwa kufunga mabao 15.

 Utaona mabao 15 ni mengi, lakini Yanga iliyo kileleni mechi sawa na Simba, ina mabao 20 na Azam FC katika nafasi ya pili ina mabao 22. Tofauti ni mabao matano hadi saba ambayo si machache kwa ligi fupi kama ya Tanzania.

Hivyo, kweli Simba wanapaswa kuimarisha safu ya ushambuliaji na juhudi zimeanza baada ya kuletwa kwa Paul Kiongera ambaye uongozi umeamua kumrejesha baada ya kumpeleka kwa mkopo katika klabu yake ya zamani ya KCB ya Kenya.

Kwangu ninaamini Kiongera ni mshambuliaji mzuri, hii naichukua kutokana na rekodi zake za Kenya kuwa mmoja ya wanaofunga hadi mabao 15 kwa msimu. Hata alipoitumikia Simba katika mechi chache kabla ya kuanza kwa msimu, alionyesha ana uwezo mzuri kusaidia mashambulizi.

Kiongera amerejea Simba, wanachotaka Simba ni kuona anaisaidia kupata mabao zaidi yanayosaidia kupatikana kwa pointi. Lakini kama naye hatasaidiwa itakuwa ni kazi bure, mwisho ataonekana hafai.

Lazima tukubali, hakuna mchezaji anayeweza kufanya vema bila ya msaada wa wenzake. Hivyo, wachezaji walio ndani ya Simba nao lazima wakubali kumpokea Kiongera, kushirikiana naye na kuifikisha timu katika lengo sahihi wanalotaka uongozi na Wanasimba wengine.

Kiongera kwa kiwango cha ligi zetu kama hii ya Tanzania Bara, ana uwezo mkubwa wa kuwa msaada sahihi kwa Simba hasa kama hataumia. Bado anaweza kukwamishwa kwa mengi kwa kuwa ndani ya timu kuna mengi sana.

Najua wengi wanahofia kusema ukweli, lakini wivu na husda pia ni matatizo makubwa na yanawakwamisha wengi. Watakaofanya hivyo wajue hawatakuwa wameukwamisha uongozi pekee.

Badala yake watamkwamisha kweli Kiongera, watamkwamisha Rais wa Simba, Evans Aveva na viongozi wengine, watawakwamisha mashabiki lakini mwisho watakuwa wamejikwamisha wao kuchezea timu isiyokuwa na hatua.

Lazima wachezaji walio ndani ya Simba wakubali pia kuwa pamoja na wakubaliane na mfumo wa kusaidiana kama kitu kimoja.

Hakuna timu iliyowahi kufanikiwa bila ya upendo. Hakuna upendo, mafanikio yanabaki hadithi. Mpokeeni Kiongera lakini lazima mtangulize upendo na kuaminiana, ndiyo mtaweza kuitoa Simba ilipo sasa.