MIAKA 11 YA KIFO CHA MBAMBA USWEGE, BASKETBALL HAINA AFYA, IKO TAABANI NA MWISHO WAKE HAUJULIKANI

MBAMBA USWEGE (KATIKATI) AKISHUGHULIKIA UTOAJI WA TUZO ALIYOPOKEA MR II KUTOKA KWA JAKAYA KIKWETE AMBAYE WAKATI HUO ALIKUWA NI MMOJA WA MAWAZIRI KATIKA SERIKALI YA RAIS BENJAMIN MKAPA.

Na Saleh Ally

WAKATI Mbamba Uswege akiwa katibu mkuu chini ya Simon Msofe, Chama cha Mpira wa Kikapu Dar es Salaam (BD) kilikuwa kinajulikana na huenda umaarufu wake ulitokana na gumzo la mchezo wa kikapu uliopatikana baada ya utendaji bora.

Licha ya kuwepo kwa Mwenyekiti Msofe, lakini Uswege alikuwa maarufu sana kutokana na kuwa mpiganaji kwelikweli.

Kipindi cha Uswege, mambo mengi sana yalikuwa tofauti ukilinganisha na kipindi cha miaka miwili baada ya kifo chake, halafu baada ya hapo ikawa si kupanda mlima na badala yake kuteremka zaidi na zaidi.

Baada ya kifo cha shujaa huyo wa mpira wa kikapu, leo hakuna chochote kipya ambacho tasnia ya michezo upande wa mpira wa kikapu unapaswa kujivunia, nasema hakuna.

Kwani viongozi waliofuatia baada ya Uswege wakaonekana hawakuwa na nia ya dhati, au hawakuwa na mapenzi ya kweli kusaidia maendeleo.

Huenda walifurahishwa na mafanikio ya Uswege ambaye alikuwa ushawishi mkubwa kusaidia kupatikana kwa udhamini kutoka Kampuni ya Bia Tanzania (TBL) kupitia bia yake ya Kilimanjaro. Mpira wa kikapu, kila timu ilipata vifaa na wadhamini wakatoa zawadi.

Changamoto kwa maana ya ushindani ilikuwa kubwa, kulikuwa na Yanga na Simba ya mpira wa kikapu ambayo ilizikutanisha timu za Pazi na Vijana. Ilikuwa ni mshikemshike kwelikweli.

Lakini kulikuwa na timu zilizojenga ushindani mkubwa kwa wakongwe Pazi na Vijana, kama unawakumbuka ABC, JKT, UDSM, Don Bosco, Chang’ombe ambayo ilikuwa ina wachezaji kama Mheshimiwa Temba ambaye sasa ni msanii maarufu wa muziki wa Hip Hop.

Raha ya mpira wa kikapu haikushia katika timu, unamkumbuka Ramadhani Abdallah ‘Dullah’, Franklin Simkoko, Frank Bategeki, Michael Mwita, Ally Dibo na wengine wengi walioufanya mchezo huo kuwa na mashamsham kila mechi zake zinapochezwa. Sasa unamjua staa gani?

Upinzani ulikuwa mkali hadi kufikia kuonekana umegawanyika mara mbili. Timu za jeshi dhidi ya uraiani, pili timu za uraiani dhidi ya zile za uraiani.

Watu walikuwa wakitokea sehemu mbalimbali za Jiji la Dar es Salaam kwenda kushuhudia mechi katika Uwanja wa Ndani wa Taifa.

Mpira wa kikapu pia ulijumuisha michuano mbalimbali ikiwemo ile ya majiji ambayo ilikuwa na ushindani wa juu kabisa na Dar, Mwanza na hata Mbeya baadaye zilionyesha ushindani. Sasa kila kitu kinaonekana kimefeli na hadithi ni nyingi kuliko vitendo.

Viongozi waliongia madarakani baada ya kumpoteza Uswege, wengi walidhani mambo ni rahisi kwa kuwa yalionekana yanakwenda poa kabisa. Kumbe hawakujua mtu huyo alikuwa mchapakazi mwenye ndoto ya kuufikisha mbali mchezo wa kikapu.

Baada ya mambo kuwashinda, watu hao zaidi walianza kulalamikia vyombo vya habari haviwajali sana. Baadaye wakaelekeza lawama kwa wadhamini kwamba wameusahau mchezo huo pia.

Kama haitoshi kwa kuwa lawama zikawa ndiyo msingi, watu hao wakazidi kutupa lawama zaidi na wakaziangusha kwa serikali kuwa imewasahau huku ikisaidia michezo mingine. Nafikiri kulaumu kupindukia kuliwafanya wasahau kwamba serikali haisadii michezo kabisa!

Wakati wa Uswege hakulaumu waandishi wala wadhamini, badala yake alipambana na tatizo kufanya mambo vema. Inaonekana walio kwenye uongozi wa vyama au klabu za mpira wa kikapu ni watu wanaofaa kufanya kazi zinazohusu midomo pekee. Maana wanazungumza tu na si watendaji.

Sasa wana udhamini mzuri kutoka Azam, hata kama ungekuwa ni mdogo, lakini utaona wana sababu nyingi za kufanikiwa. Wametengewa kipindi kwenye runinga, waandishi bado wanawahoji, lakini bado wanalaumu tu na mafanikio hakuna.

Msiba wa Uswege haukuwa wa familia yake tu, ni kwa Watanzania wote wapenda michezo. Leo miaka 11 tangu msiba wake ulipotokea kwa ajali pale Makumbusho jijini Dar, msiba unazidi kuwa mkubwa zaidi kwa kuwa juhudi zake zimeondoka, mpira wa kikapu nao umeweka ‘pause’.