SHIME ANAITAKA YANGA HATA ASUBUHI, YUKO TAYARI KABISAAAAA

SHIME AKITOA MAELEKEZO KWA WACHEZAJI WAKE WAKATI WAKIWA MAZOEZINI MJINI TANGA.

Kocha wa Mgambo Shooting, Bakari Shime, ameibuka na kutamba kuwa anatamani kupambana na wapinzani wake hata asubuhi kutokana  na maandalizi mazito waliyofanya.

Mgambo watakuwa wenyeji wa Yanga Jumamosi kwenye Uwanja wa Mkwakwani mjini Tanga wakati Ligi Kuu Bara itakapoanza kutimua vumbi tena. 

Msimu uliopita, Yanga ilifanikiwa kuvunja mwiko wa Mgambo kwa kuichapa mabao 2-0 katika Uwanja wa Mkwakwani baada ya kusumbuana kwa muda mrefu na siku ya Jumamosi zitashuka kwenye uwanja huohuo kusaka alama tatu.

Mgambo kwa sasa ipo nafasi ya tisa ikiwa na alama 11 huku Yanga ikiwa nafasi ya pili na ina alama 23.

 Shime alifunguka kuwa kwa sasa timu yao ipo vizuri, hivyo muda wowote, hata iwe asubuhi wanatamani kupambana na Yanga na kuchukua pointi zote.   

“Safari hii Yanga haina nafasi kwetu kwa jinsi tulivyojipanga natamani wafike hata leo na mechi yetu ichezwe asubuhi, maana kusubiri mpaka jioni naona itakuwa kama tunapoteza muda kwa kweli.

“Na mchezo wetu tunaingia kwa kujiamini kiukweli licha ya kutofanya usajili wowote dirisha hili lakini Yanga hawatupi presha hata kidogo, zaidi tunafikiria kupambana tu na kuondoka na alama zetu tatu.

“Nafahamu kuwa katika timu za Tanga sisi walau tuko vizuri lakini tunataka kufanya vizuri zaidi kwa michezo yote iliyopo mbele yetu ili kuhakikisha tunashinda yote,” alisema Shime.