WATAKAOWAPINGA YANGA, AZAM CAF KUJULIKANA JUMANNE IJAYO

Yanga na Azam FC zitawajua wapinzani wao kwenye michuano ya kimataifa soon maana wanatarajiwa kuwekwa hadharani Desemba 15, mwaka huu tayari kwa kuanza michuano ya Ligi ya Mabingwa Afrika na Kombe la Shirikisho Afrika.

Yanga inaiwakilisha Tanzania kwenye michuano ya Ligi ya Mabingwa Afrika baada ya kuibuka mabingwa wa ligi kuu msimu uliopita, huku Azam yenyewe ikiiwakilisha nchi katika michuano ya Kombe la Shirikisho.

Katibu Mkuu wa Yanga, Dk Jonas Tiboroha, ameeleza kuwa kufuatia ratiba hiyo inayotarajia kutoka Desemba 15, Yanga imeandaa mikakati madhubuti kuhakikisha inafanya vyema katika michuano hiyo.

“Ratiba ya Caf itakuwa hadharani ifikapo Desemba 15 na sisi kama Yanga tayari tuna mikakati yetu tuliyoiandaa kuelekea michuano hiyo ili kuweza kufanya vyema.

“Tupo katika mazungumzo na timu tano kwa ajili ya kucheza nazo mechi za kirafiki ili kuimarisha timu yetu kuelekea michuano hiyo ambapo miongoni mwa timu hizo zinatoka nchi za Afrika Magharibi.

“Tutatumia michuano ya FA na Kombe la Mapinduzi kwa ajili ya kuwaangalia wachezaji wa kikosi cha pili huku wale wa kikosi cha kwanza wakitumika kujiandaa na michuano ya Caf kwa kucheza mechi hizo,” alisema Tiboroha.

Ubingwa wa michuano hiyo unashikiliwa na TP Mazembe na Yanga wanataka kutumia mechi hizo tano kwa ajili ya kuwavua ubingwa huo.