MAKACHERO WA SIMBA WAIFUATA NKANA FC KIBABE, MIPANGO IMEIVA

Kikosi cha Mabingwa watetezi wa Ligi Kuu Tanzania Bara, Simba kinatarajiwa kuondoka jumatano kwa mafungumafungu kuelekea nchini Zambia ili kuweza kuwakabili wapinzani wao Nkana FC katika mchezo wao wa Ligi ya Mabingwa.

Mchezo wa hatua ya kwanza Simba atakuwa ugenini akicheza na Nkana siku ya jumamosi na marudio yanatarajiwa kuwa Desemba 23 au 24 Dar es Salaam katika uwanja wa Taifa huku taarifa zikieleza kuwa tayari makachero wa Simba wametia timu Zambia.

Katibu wa Simba Dr. Anorld Kashembe amesema maandalizi yapo sawa na wanatarajia kuondoka kimafungu kwa kuwa kuna wengine ambao wametangulia kuweka mipango sawa huku wengine wakifuata kuungana nao baadaye.

"Mpaka sasa tumeshatambua kuwa aina ya timu tunayokwenda kucheza nayo ni ngumu hivyo tumedhamiria kupata matokeo mazuri, kwa kuanza safari yetu tunajigawa makundi kuweza kufika Zambia kwa kuwa hatuwezi kwenda wote kwa wakati mmoja.

"Taratibu zote zipo sawa na uhakika wa kufanya vizuri ni mkubwa ndiyo maana kuna watu ambao wametangulia kuanza kufanya maandalizi kwa ajili ya timu yetu, kuhusu kuondoka kwa wachezaji na viongozi utaratibu utakuwa wazi," alisema.