MAUMIVU MENGINE KUTOKA UGHAIBUNI, SAFARI HII KUTOKA KWA CHILUNDA!

NA SALEH ALLY

MOJA ya matamanio makubwa nimekuwa nayo siku nyingi sana ni kuona Tanzania inakuwa na wachezaji wengi wa kulipwa nje ya nchi yetu.

Wachezaji wa kulipwa ndiyo dawa ya hesabu za muda mfupi kujiondoa tulipo. Baada ya hapo tunaweza kuanza kupiga hesabu za muda mrefu ambazo ni suala la vijana ambalo linahitaji subira kubwa.

Kama tukiwa na wachezaji wengi wa kulipwa, maana yake ni hivi, watakuwa ni tofauti na waliojifunza mengi, rahisi kwao kutoa msaada kwa Tanzania ili tuweze kupiga hatua kwa kuwa watajifunza mambo mengi wanapokuwa nje ya Tanzania.

Wachezaji wanaocheza nje ya Tanzania wanakutana na mengi ambayo hawakuwahi kujifunza na baada ya hapo, wanaanza kujua kile ambacho awali hawakukijua. Mfano angalia wachezaji wanaocheza nje ya Tanzania wanavyojua kuhusiana na umuhimu wa timu ya taifa kuliko walio hapa nyumbani.

Wengi walio hapa nyumbani wanaweza kuona timu ya taifa ni kuchoshana na haina maana. Lakini kama unacheza nje ya Tanzania, timu ya taifa ni sehemu ya thamani yako na heshima unayoweza kupewa huko uliko, hivyo wengi wanaocheza nje wanaichukulia kwa juu sana.

Kidogo nimeanza na mzunguko lakini nataka kulenga kuhusiana na Shaban Iddi Chilunda. Kinda Mtanzania anayecheza katika kikosi cha Ligi Daraja la Kwanza nchini Hispania akiwa na Klabu ya Tenerife.

Hivi karibuni, Tenerife imetoa siku kadhaa hadi mwisho wa mwezi huu wa Desemba, kama Chilunda atakuwa ameshindwa kujirekebisha katika suala la kiwango chake, basi ataonyeshwa mlango wa kutokea.

Inaonekana amecheza dakika 22 tu katika mechi za mashindano tangu amejiunga na timu hiyo. Wao wanaona si sahihi na msisitizo ni kwamba, wakimpa nafasi haonyeshi juhudi.

Nashukuru nina nafasi ya kupata taarifa kuhusiana na hilo na nilijaribu kudadavua kwa lengo la kujifunza na kutaka kufahamu zaidi kuhusiana na huyu kijana wetu kutoka Tanzania.

Natambua mafanikio ya Chilunda ni hatua kwa mpira wa Tanzania na ningetamani kumuona anategemewa na Tenerife na baadaye aende sehemu nyingine kubwa zaidi ikiwezekana La Liga na kadhalika.

Kote nilikofuatilia wameniambia kitu kinachofanana na ninaamini hawawezi kuwa na sababu ya kumbania Chilunda hasa kama atakuwa msaada katika kikosi chao, maana yake hawawezi kumlalamikia.

Kama wanasema hajitumi na haonyeshi juhudi, basi lazima kutakuwa na tatizo. Lazima ayafanyie kazi matatizo yake badala ya kulalamika.

Nimeelezwa kwamba naye alisema timu haimpi nafasi, lakini timu inasema ikimpa nafasi haonyeshi chochote na wanaona kama kumpa nafasi wanaipoteza ndiyo maana wameamua kutoa masharti.

Kama utakwenda kucheza Ulaya halafu ukataka kuilazimisha timu ifanye unavyotaka, hakuna ubishi lazima utafeli. Hili limewatokea wachezaji wengi waliotokea Afrika na Tanzania ikiwemo.

Sasa kwa Chilunda anaweza kuona kuondoka Ulaya ni sawa kwa kuwa Tanzania anahitajika. Lakini hili ni kosa kwa kuwa kwa uwezo wake na alipofikia anatakiwa kuondoka Tanzania na kuendelea kupambana.

Pia ishu hii ya Chilunda inatuonyesha kucheza Ulaya ni zaidi ya uwezo wa uwanjani pekee. Suala la kujituma, nidhamu ya usikivu na matendo ni mambo ambayo hapa nyumbani yapo kwa kiwango cha chini.

Sasa mchezaji anapokuwa timu kubwa kama Simba, Yanga au Azam FC, anaona kama ameyaweza yote na anapopata nafasi nje anaonekana yuko katika kiwango cha chini na yeye anashindwa kukubaliana na hilo. Chilunda anapaswa kujitazama mara mbili na ikiwezekana apambane kupata nafasi ili maisha yawe magumu mwanzo na baadaye asonge mbele.

Kumbukeni, Mbwana Samatta awakati anatua TP Mazembe alimkuta nahodha Tresor Mputu ndiye kila kitu. Lakini mwisho alifanikiwa kuwa mfalme, haikuwa rahisi. Hivyo kama mnatamani kuwa kama Samatta, mjue hakufika hapo kwa ndoto za kulala usingizi wa pono, alipambana.