SUALA LA KAKOLANYA LIMEFIKIA HAPA, HUYU HAPA SAUTI YA MWISHO

Hatma ya Kipa, Beno Kakolanya wa Yanga kuendelea kuitumikia klabu hiyo ipo mikononi mwa kocha Mwinyi Zahera baada ya kumkataa, ambapo kwa sasa wanasubiria uongozi wa klabu hiyo kuweza kuzungumza na kocha huyo ili kujua lini atarejea.

Kakolanya kwa sasa yupo njia panda kuweza kurejea katika kikosi hicho mara baada ya kumalizana na uongozi wake kutokana  na mgomo aliokuwa nao hivi karibuni ambapo kwa sasa suala limebakia kwa kocha Zahera kuweza kuamua juu ya kumrejesha baada ya kumkataa.

Meneja wa Beno, Seleman Haroub, amesema kuwa kilichobakia kwa upande wao wanasubiria maamuzi ya viongozi wa Yanga ambao wamesema watakutana na kocha kwa ajili ya kuzungumza naye kwa kuwa amemkataa.

“Kama ilivyosikika kuwa mwalimu Zahera amemkataa Beno, hivyo kwa sasa tunausubiria uongozi uweze kuamua juu ya mchezaji huyo kwani walikuwa katika  vikao vyao vya klabu na wakimaliza ndipo  tutakaa kuzungumza suala la Beno.

“Kuhusu kuanza mazoezi kunategemea na maamuzi ambayo wataafikiana uongozi na kocha wao, hivyo  hatujajua nini kitatokea,” alisema, Haroub.

Mwenyekiti wa Kamati ya Usajili wa Yanga, Husein Nyika amesema kuwa mwalimu alikuwa na tatizo na Kakolanya ila muda si mrefu kila kitu kitakuwa sawa.

 “Ndio kweli mwalimu alikuwa na tatizo na Kakolanya, Sisi kama uongozi tutakutana na mwalimu kuweza kulizungumzia suala hilo na mambo yote yatakwenda sawa.” alisema.

Zahera kwa sasa yupo nje ya nchi ambapo alisema kuwa anakwenda kushughulikia masuala yake binafsi na akimaliza atarejea ili kuendelea na majukumu yake ndani ya Yanga.