UNAI AJITOSA KUMTETEA OZIL

Mesut Ozil ni mchezaji ambaye anaongoza kwa kukunja mshahara mrefu zaidi Arsenal kila wiki, lakini pia ni mchezaji wa timu hiyo anayeongoza kwa kutopata nafasi ya kucheza msimu huu.

Ozil anapokea kitita kikubwa cha pauni 350,000 (Sh bilioni moja na ushee) kwa wiki lakini kocha wake, Mhispania, Unai Emery hataki kumtumia akidai hayupo kwenye mipango yake.

Kabla ya mchezo wa jana Jumapili dhidi ya Crystal Palace, Ozil alikuwa hajahusishwa kukaa hata benchi katika mechi tano mfululizo, zikiwemo za Europa na Carabao Cup.

Emery juzi alisisitiza kuwa ana sapoti ya viongozi wa Arsenal kwa kuendelea kutomtumia Ozil.

“Hapa tuna mkakati mmoja tuliokubaliana kama klabu na kama timu,” alisema Emery alipoulizwa kama kuna presha yoyote kutoka juu kuhusu kumtumia Ozil.

“Kwa sababu kitu cha msingi zaidi ni klabu na kutafuta kiwango. Najua mashabiki wote wanataka kujua kitu, lakini sasa siyo wakati sahihi. Nadhani siyo muda wa kuzungumza kuhusu yeye.”