MWADUI YAFICHUA ILIVYOWABANA KAGERE NA MIRAJ UWANJA WA KAMBARAGE

ROJAS Gabriel, beki wa kikosi cha Mwadui FC aliyesajiliwa msimu huu akitokea Mtibwa Sugar amesema kuwa walipewa majukumu ya kuwabana washambuliaji wote wa Simba wanaoongozwa na Meddie Kagere pamoja na Miraj Athuman mwanzo mwisho jambo lililowafanya wasilete madhaara.

Simba ikiwa inaongozwa na Kagere ilipoteza mchezo wake wa kwanza msimu huu mbele ya Mwadui FC uwanja wa Kambarage baada ya kucheza mechi sita ambazo ni sawa na dakika 540 bila kupoteza .

Akizungumza na Saleh Jembe, Rojas amesema kuwa walitumia muda mwingi kuisoma Simba na falsafa yao jambo ambalo halikuwapa taabu kuwadhibiti kwenye mchezo wao wa ligi.

“Tuliwatambua ni washambuliaji wa aina gani hasa muda wao wa hatari ni ule wakiwa na mpira mguuni na kabla ya kupokea mpira wanakuwa wanyumbulifu kutafuta nafasi jambo hilo lilitufanya tuwachunge mwanzo mwisho.

“Hakukuwa na nafasi ya Kagere wala alipoingia Miraji kuachwa kutembea peke yake kauli yetu ilikuwa ni mtu na mtu mpaka mwisho wakachoka kutokana na kubwanwa na juhudi zilitusaidia tukaibuka na pointi tatu,” amesema Rojas.