YANGA: TUTACHEZA KISHUJAA MBELE YA WAPINZANI WETU KUSHINDA

NOEL Mwandila, Kocha Msaidizi wa timu ya Yanga amesema kuwa wana matumaini ya kufanya vizuri kesho mbele ya Prymids baada ya kutambua makosa yao kwenye mchezo wa kwanza jambo watakaloliepuka kwenye mchezo wa  marudio wa Kombe la Shirikisho unaotarajiwa kuchezwa Novemba 3.

Kwenye mchezo wa kwanza uliochezwa uwanja wa CCM Kirumba Yanga ilikubali kufungwa mabao 2-1 na Pyramids hivyo ili kusonga mbele watahitaji mabao 2-0 ugenini.

Mwandila amesema kuwa mpira wa sasa umebadilika tofauti na zamani jambo linalowapa nguvu ya kupindua meza kibabe  kwenye mchezo wa marudio.

“Tulizidiwa mbinu kipindi cha kwanza hilo lipo wazi ila kipindi cha pili tulibadilika na timu ilicheza mpira ambao ulionekana na kila shabiki, kwa kuwa tumefungwa tunajiaanda kushinda kwao hakuna jambo jingine.

“Hakuna darasa la kukata tamaa kwenye mchezo wa mpira jambo linalotufanya tuamini kwamba nasi tutashinda, lengo letu ni moja kuwafuata wapinzani wetu kishujaa na si kinyonge kwani wanafungika,” amesema Mwandila.