HAWA SINGIDA UNITED NAONA BADO HAWAJASHTUKA NDANI YA LIGI KUU BARA

WAKATI mwingine nyakati zinabadilika na ni muhimu pia kwa wale ambao wanaishi kwenye nyakati kukubali mabadaliko na kwenda nayo kasi ili yasiwaache.

Nakumbuka wakati ule nikisoma msemo wa polepole ndiyo mwendo pamoja na kawia ufike ilikuwa inatumiwa sana na kutupa nguvu kwamba tunaweza kufanya mambo yote kwa kuwa muda upo.

 Jambo ambalo wakati mwingine lilikuwa linatufanya tushindwe kuyatimiza majukumu yetu kwa wakati na kuhstuka kukiwa kumepambazuka.

Haina maana kwamba tunapaswa tufanye mambo yote kwa harakaharaka hapana kila kitu kinahitaji umakini mkubwa ambao utatufanya tupate matokeo mazuri.

Ukweli unabaki palepale kwenye Ligi Kuu Bara hata huko England timu ambayo ina uwekezaji mzuri inapata matokeo bora kwa kuwa mpira wa sasa ni pesa.

Ipo wazi kwa sasa kasi ya Singida United inazidi kuporomoka na kwa hapa walipofikia wanapaswa waanze kujiandaa kisaikolojia namna ya kurejea tena kwenye ligi wakati mwingine tena.

Kuna timu ambazo zilipanda daraja na kucheza msimu mmoja ziliposhuka hazijaweza kurudi kutokana na ushindani uliopo kwenye Ligi Daraja la Kwanza lakini kwa Singida United ni miujiza inahitajika ili kuona inabaki ndani ya ligi.

Tangu ligi kuanza haijawahi kuthubutu kuwa ndani ya tano bora hata mara moja pamoja na 10 bora jambo linaloonyesha kuna hatari ambayo imefika mlangoni inasubiri kuingia ndani.

Uzuri ni kwamba kila ambaye unamtazama aeleze sababu ya kukwama kwao hakuna ambaye anakueleza kwa ufasaha zaidi ya sababu ambazo zinawekwa wazi na mwalimu kwamba ni umakini mdogo wa wachezaji ambao wanao.

Suala kubwa kwa sasa ni ukata ambao unaimaliza Singida United lakini kuna nyakati ilikuwa inapitia kipindi cha neema wakati huo jicho la viongozi wa Singida United lilikuwa linatazama nini mbele?

Kiongozi yupo kwa ajili ya kutengeneza matatizo na kuyatatua kwa wakati sasa hapo ndipo uongozi wa Singida United unapaswa ukae chini utazame wapi hesabu zilianza kuwakataa kabla ya kurudi Ligi Daraja la Kwanza.

Inawezekana wadhamini ni tatizo lakini hakuna mdhamini anayeweza kuwekeza sehemu ambayo hakuna ushindani timu icheze nyumbani inafungwa iwe ugenini inafungwa hili linazidi kuongeza ukakasi.

Kupoteza mbele ya Coastal Union na kupoteza mbele ya Tanzania Prisons kwa mechi za hivi karibuni kunaifanya Singida United kufikisha mechi 19 ambazo zimepotea mbele wapinzani wao hili ni balaa.

Kwa zile ambazo zimepanda msimu huu zinapaswa zitambue kwamba maisha ndani ya ligi hayana muda mreufu iwapo hakutakuwa na mipango makini ambayo itakuwa inafanyiwa kazi kwa vitendo.

Labda Singida United hawajatambua kwamba msimu huu timu nne zinashuka jumlajumla labda bado wanavuta kasi lakini kwa wakati huu wasikazane kumtafuta mchawi wapambane kutafuta matokeo.

Kushika nafasi ya 20 ukiwa umepoteza mechi 18 baada ya kucheza mechi 26 na kujiwekea kibindoni pointi 12 ni hatari kwa afya ya soka la timu husika tathimini inapaswa ifanyike kwa upesi.

Ninaona kwamba kama maisha ndani ya ligi yamekuwa magumu namna hii endapo watashuka daraja watatumia muda mwingi kujipanga kurudi, ni wakati wao wa kuweka wazi kile kinachowasibu kwani timu nyingi zinapitia kipindi kigumu lakini zinaonyesha utofauti kwa kupambana ili kupata wawekezaji.