HIZI HAPA MECHI ZILIONGEZWA ZAIDI YA DAKIKA TANO UWANJANI

IDADI kubwa ya mashabiki wamezoea kuona katika mechi mwamuzi wa mezani akiongeza dakika mbili, tatu au nne lakini zinapoongezwa zaidi ya hizo basi kunaibuka minong’ono ya hali ya juu.

Zipo sababu nyingi zinazochangia mwamuzi kuongeza idadi kubwa ya dakika kabla ya mechi kuisha miongoni mwao ni pamoja na kama timu moja ilipoteza muda, tukio la kuumia wachezaji au mechi kusimama kutokana na majanga ya kiasili.

Kuna idadi nyingi tu ya mechi ambazo zimewahi kuongezwa zaidi ya dakika tano kabla ya kumalizika. Jambo hilo limejitokeza katika Ligi Kuu Bara ambapo kuna mechi ziliongezwa zaidi ya dakika tano.

Katika makala haya kuna mechi za Ligi Kuu Bara ambayo ambayo inatarajiwa kuanza kutimua vumbi Juni 13 baada ya masuala ya michezo kusimama kutokana na janga la Virui vya Corona hizi hapa :-

Azam vs Kagera Sugar dk 9

Hii ndiyo mechi ambayo hadi sasa inashika rekodi ya kuwa mechi iliyoongezwa muda mrefu baada ya ule wa awali yaani dakika 90 kumalizika. Mechi hii ilipigwa Uwanja wa Azam Complex na kumalizika kwa suluhu.

Kwenye mechi hii ziliongezwa dakika tisa baada ya zile 90 kugota ukingoni lakini licha ya muda wote huo ambao uliongezwa timu hizi hazikufungana na kugawana pointi moja. Pambano hili lilipigwa Novemba 4.

Simba vs Prisons dk 7

Katika mchezo huu kwa mara ya kwanza Simba wakai ule ikiwa chini ya Mbelgiji wake Patrick Aussems walipata sare kwenye mechi zao za ligi baada ya kucheza mechi saba wakishinda sita na kufungwa moja.

Katika mchezo huu ziliongezwa dakika saba baada ya zile 90 kumalizika kitu ambacho kiligeuka gumzo katika mitandao mbalimbali wengi wakijadili juu ya kuongezwa kwa dakika hizo. Hata hivyo licha ya dakika saba kuongezwa mwishoni walitoka suluhu.

Mtibwa vs Polisi Tanzania dk 6

Ingawa Mtibwa Sugar walianza kwa kupepesuka katika ligi lakini walipokutana na Polisi Tanzania waliamka na kuwachapa mabao 2-0 katika Uwanja wa Jamhuri, Morogoro. Sasa weka kando ishu hiyo ya matokeo kitu kikubwa kilichojitokeza ni ishu ya kuongezwa kwa dakika nyingi baada ya zile 90.

Mechi hii ilishuhudia dakika sita zikiongezwa kabla ya kumalizika kwake lakini dakika hizo hazikuwa na faida yoyote kwa Polisi kwani mwisho waliziacha pointi tatu katika uwanja huo.

Mbao vs Tanzania Prisons dk 6

Miongoni mwa mechi ambazo zilipigwa hadi jioni sana kwenye Ligi Kuu Bara kwa msimu huu ni hii ikichezwa kwa dakika 90+6, ambapo ilipigwa katika Uwanja wa CCM Kirumba mkoani Mwanza na kumalizika kwa sare ya bao 1-1.

Alliance vs Mbeya City dk 5

Shughuli nzima ilifanyika katika Uwanja wa Nyamagana, Mwanza ambapo mchezo huu ulikuwa na matukio kwelikweli. Kumbuka hii ndiyo mechi ambayo wachezaji wawili wa Alliance walikula ‘umeme’ kwa vitendo visivyo vya kiuanamichezo akiwemo kipa wa timu hiyo jambo ambalo lilisababisha beki Siraji Juma kukaa langoni.

Sasa sahau kabisa ishu hizo kitu kingine kilichokuwa gumzo ni dakika tano ambazo ziliongezwa ambapo kwa Alliance ambao walikuwa nane uwanjani zilikuwa nyingi na Mbeya City ambao walikuwa 11 walishindwa kuwafunga wapinzani wao wakiwa pungufu.

Yanga vs Ruvu Shooting dk 5

Ukiwa mchezo wa kwanza tu kwa timu zote. Yanga walijikuta wakiangukia pua kwa kufungwa bao 1-0 na maafande hao, ambapo huu ulikuwa mchezo wa kwanza kwa Kocha Mwinyi Zahera aliyekuwa Yanga kupoteza katika msimu.

Mzigo huu ulipigwa Agosti 28, katika Dimba la Uhuru na mechi hii iliingia kwenye rekodi za kuchezwa kwa muda mrefu msimu huu kwa kuongezwa dakika tano.

Yanga vs Polisi Tanzania dk 5

Wengi wanaikumbuka mechi hii kwani ndiyo ilimpaisha Ditram Nchimbi baada ya kufunga hat trick. Mechi hii licha ya kuwa kali na kusisimua iliingia kwenye rekodi ya kuchezwa kwa muda mrefu baada ya kupigwa kwa dakika 95 yaani 90 za kawaida na zile tano za nyongeza.