WACHEZAJI WAPYA KWA SASA HUKUMU YAO BADO KIDOGO

 

 

KIPINDI cha usajili kimemalizika na timu za Ligi Kuu Bara zilifanya usajili kuanzia Agosti Mosi hadi Agosti 31, mwaka huu.

 

Baada ya hapo, ligi ikaanza wikiendi iliyopita na wiki hii kipute kinaendelea kama kawaida ikiwa ni raundi ya pili.

 

Kabla sijaenda mbali sana, nitoe pongezi kwa klabu ambazo zilifanikiwa kufanya usajili kulingana na mahitaji ya timu zao na sasa nyota hao wanatarajiwa kufanya makubwa.

 

Usajili ulipofanyika tuliona timu zikipambana kujiimarisha hasa zile ambazo zilipanda daraja kwa upande wa Ligi Kuu Bara ambazo ni Ihefu, Gwambina na Dodoma Jiji.

 

Ubora wa wachezaji ambao waliwasajili kwenye usajili huu, tunaamini kabisa matunda yataonekana katika msimu huu wa 2020/21, kutokana na baadhi ya timu kufanya mabadiliko makubwa kwenye vikosi vyao kwa asilimia 80 mfano mzuri Yanga.

 

Pamoja na klabu kufanya usajili huo bora lakini pia wanatakiwa kuzingatia pia ubora na nafasi za wachezaji wa ndani kupewa nafasi kwa ajili ya maandalizi ya timu yetu ya taifa ambayo ina michuano mbeleni ya kufuzu kucheza fainali za Mataifa ya Afrika.

 

Hivyo ni vizuri kwa timu zile ambazo zina wachezaji wa kigeni kuangalia kwa umakini kwa wachezaji wazawa kupewa nafasi kuonyesha ubora kwa maslahi ya taifa letu kuhakikisha tunapata nafasi ya kushiriki michuano hiyo mwakani.

 

Lakini hilo lisiwe chachu ya kuwadumaza wazawa, mnatakiwa kujituma kwa nguvu zenu zote, ndipo mpate nafasi.

 Mnaweza kupewa nafasi kisha mkazifelisha timuzenu.

 

Nikiigusia mada husika, tumeona wachezaji walipocheza mechi za kwanza, wapo ambao walicheza vizuri na wengine kushindwa kuonesha viwango vyao.

 

Kwa wale ambao walifeli katika mechiya kwanza,isiwe sababu ya kuwacheka na kuwakatisha tama kwani ni mapema kupima viwango.

 

Bado kuna mechi nyingi mbele ambazo zinatakiwa kuchezwa kwa kila timu. Kumbuka timu zipo 18 na kila moja itacheza mechi 34.

 

Kucheza mechi moja maana yake zimebaki 33, hivyo hapo mchezaji anaweza kubadilika na kuonesha makali yake.

 

Wachezaji wengi huwa wanafeli kuendana na hali ya ligi fulani hasa kwa wale wageni, hivyo ukiona mchezaji kashindwa usimcheke, tazama namna anavyohangaika na utambue nini kimemfelisha.

 

Mifano ya wachezaji wa aina hiyo ipo mingi, siyo Tanzania tu, bali dunia nzima. Utakuta mchezaji alipotoka alikuwa tegemeo, lakini anapoenda ana kuwa hana msaada wowote.

 

Kupitia mechi hizi za kwanza, tusipime viwango vya wachezaji, tuwape muda angalau mechi kumi, kisha baada ya hapo ndiyo majibu ya kweli yatapatikana.

 

Yote kwa yote tunataka kuona wachezaji wanapokuja kucheza soka Bongo walete ushindani wa kweli nakuifanya ligi yetu kuwa miongoni mwa ligi bora Afrika.

 

Tuna wachezaji kutoka mataifa mbalimbali kufikia 15 ambao kwa msimu huu wataonekana kwenye LigiKuu Bara, hivyo kati ya hao, wapo ambao wataitangaza vema ligi yetu.

 

Mpaka sasa tunajivunia uwepo wa Haruna Niyonzima, Meddie Kagere, Clatous Chama, Bernard Morrison na wengineo ambao viwango vyao vimewafanya mashabiki wa soka hata waliopo njeya Tanzania kuifuatilia ligi yetu.