WAWAKILISHI WA KIMATAIFA SIMBA NA NAMUNGO MNA KAZI YA KUFANYA

 

BAADA ya kupewa nafasi na Bodi ya Ligi (TPLB) ya kujiandaa na michuano ya kimataifa timu za Simba na Namungo zinapaswa kutumia muda huo vyema kwa ajili ya maandalizi yao kuelekea kwenye michezo hiyo.

Kwa mujibu wa taarifa iliyotolewa na Mtendaji Mkuu wa Bodi ya Ligi, Almas Kasongo ilieleza kuwa timu hizo ratiba zao za Ligi zitasogezwa mbele ili timu hizo zipate maandalizi ya kutosha kuelekea kwenye michezo yao ya kimataifa.

Hivyo kupitia taarifa hiyo ni vyema muda huo ukatumika vizuri kwa timu hizi mbili ili kufanya maandalizi mazuri yatakayoweza kuleta matokeo chanya kwenye mechi hizo za awali.

Simba ikiwa na kibarua cha kumenyana na Plateau FC ya Nigeria kati ya Novemba 27-29 kwenye Uwanja wa New Jos nchini Nigeria, katika michuano ya Klabu bingwa barani Afrika.

Mabingwa hawa watetezi wa Ligi Kuu Bara wanakumbuka kwamba msimu uliopita waliboronga mwanzoni kutokana na kujiamini kupita kiasi kwa kuwa walipata mafanikio msimu ule wa nyuma.

Wakati huu yote hayo wanapaswa wayaweke kando na kuingia uwanjani kupambana kwa ajili ya taifa la Tanzania.

Katika michuano ya Shirikisho barani Afrika, Namungo watawakabili Al Rabita FC ya Sudan Kusini, Novemba 28.

Namungo chini ya Kocha Mkuu Hemed Morroco itaanza nyumbani kwenye Uwanja wa Azam Complex jijini Dar kazi ipo kusaka ushindi.

Ikiwa ni michezo ya awali tuna imani michezo mliyocheza kwenye ligi imewajenga kwa ajili ya kupata matokeo mazuri.

Ila mnapaswa mkumbuke kwamba michuano ya kimataifa ni tofauti na ligi ya Bongo hivyo ushindani ni mkubwa kuliko vile mnavyfikiria.

Kwa upande wa benchi la ufundi kazi ipo kwenye kuwaandaa wachezaji katika hali ya ushindani ili kuweza kutoa brudani kwa mashabiki na kupata ushindi.

Wachezaji wana kazi ya kutumia uzoefu pia kusaka ushindi kwa kuwa michuano ya kimataifa huwa inakuwa tofauti na vile ambavyo wengi wanafikiria.

Nahodha John Bocco, kiraka Erasto Nyoni, Clatous Chama ambaye ni kiungo bora kwa msimu uliopita wote kwa pamoja wanapaswa kuonyesha uwezo wao wote katika kusaka ushindi.

Hakuna ambaye anaamini kwamba mchezo utakuwa mwepesi hasa ukizingatia kwa Simba wao wanaanza ugenini kisha kazi inakuja kumalizwa Uwanja wa Mkapa.

Kwenye mashindano haya hasa kwenye mechi za awali ni idadi ya mabao inatazamwa hivyo ikiwa itaruhusu kufungwa ugenini itakuwa na kazi ya kupindua matokeo nyumbani.

Kasi ya Namungo kidogo inatia mashaka lakini haina maana kwamba hawana uwezo wa kupata matokeo hapana uwezo wanao.

Kikubwa benchi la ufundi kwa sasa lina kazi ya kuongeza umakini kwa safu ya ushambuliaji na ile ya ulinzi ili kuweza kutoruhusu kufungwa mechi ya nyumbani na ile ya ushambuliaji kupambania kombe kupata mabao.

Kuanza nyumbani kunapaswa kuwe ni mtihani kwa wachezaji wote kupambana kufaulu kupata matokeo mazuri.

Ushindi wa mabao mengi utatoa fursa ya kujiamini na kwenye mechi ya marudio pia itakuwa kazi nyepesi kuongeza idadi ya mabao.

Yote haya lazima yafanyike kwa umakini na usahihi kwenye mechi za awali.

Moja ya mambo muhimu kwenye michuano ya kimataifa ni kuwa na wachezaji ambao wamekuwepo kwa muda mrefu kwenye ligi na kushiriki michuano mbalimbali.

Timu hizo zinatarajiwa kuiwakilisha Tanzania katika michuano hiyo huku tukitarajia kuona zikifanya vyema na kuipeperusha bendera ya nchi kimataifa.

Watanzania wapo nyuma yenu kuwapa sapoti ili kuhakikisha mnapata matokeo mazuri na kuondoa yale yaliyojitokeza msimu uliopita kutojirudia tena.

Pia wachezaji kumbukeni hii ni fursa kwenu katika kuhakikisha mnajitangaza kwenye nchi zingine.

Hakuna mchezaji ambaye hana ndoto ya kucheza nje ya nchi hivyo mnapaswa kujituma kwa bidii.

Nidhamu, Bidii na kujituma ni muhimu kwenu wachezaji ili kuweza kufikia malengo mliyojiwekea pamoja na yale ya timu.

Aidha kwa upande wenu wachezaji mnapaswa kufuata yale ambayo mnaelekezwa na makocha mkiwa mazoezini hata kwenye mchezo.

Muda wa mapumziko mliopewa tuna imani mtautendea haki katika kufanya maandalizi na mtaenda kufanya vizuri.

Makocha pia mnapaswa kuwafuatilia wapinzani wenu katika michezo ya hivi karibuni ili kujua ni kwa namna gani mnaweza kuwakabili.

Kuangalia vipande vya picha (video) vitasaidia kwa kiwango kikubwa ili kujua ni timu ya aina gani mnaenda kukutana nayo.

Mkifanya hivyo mtajua ni mbinu gani mnaenda kuitumia pamoja na wachezaji wa aina gani watumike kwenye mchezo huo.

Endapo mtajua mbinu zao watakazo tumia itawasaidia kwenu mchezo kuwa mwepesi kwani mtajua namna ya kuwakabili vema.

Hatuhitaji kuona timu zikitolewa katika hatua za awali kama ilivyokuwa msimu uliopita maandalizi ni muhimu sana kwa upande wenu ili muweze kupata matokeo.

Kwa upande wenu Namungo ni mara ya kwanza mnashiriki michuano hiyo lakini mnapaswa kujituma kwa bidii na kuonyesha ni kwanini mliweza kufika katika hatua hiyo.

Ikiwa mechi za kwanza kila timu itapata matokeo itakuwa ni sehemu ya kwanza ya kuyafikia mafanikio.

Kila kitu kinawezekana iwapo mipango na maandalizi yatakuwa bora ndani na nje ya uwanja hakuna kinachoshindikana, tunawaamini mnakazi ya kurejesha furaha kwa mashabiki wenu.