HIZI HAPA HASARA TANO KUYEYUKA KWA MECHI YA SIMBA V YANGA

BADO Mei 8 itabaki kwenye kumbukumbu ya mashabiki na wadau wa mpira baada ya mchezo wa Ligi Kuu Bara kati ya Simba na Yanga kuyeyuka kutokana na Yanga kugomea mabadiliko ya muda.

 

Mchezo huo awali ulipangwa kuchezwa saa 11:00 jioni ila siku ya mchezo, Shirikisho la Soka Tanzania, (TFF) lilitoa taarifa kwamba muda wa mchezo utakuwa ni saa 1:00 usiku, kwa kile ilichoeleza kuwa ni kupewa maelekezo kutoka kwenye wizara.

 

Pia walieleza kuwa wametoa taarifa kwa timu zote mbili ambapo Yanga walieleza kuwa mabadiliko hayo ni kinyume cha kanuni ya 15, (10) za Ligi Kuu inayohusu  taratibu za mchezo ambayo inasema:”Mabadiliko yoyote ya muda wa kuanza mchezo yatajulishwa ipasavyo kwa pande zote husika za mchezo angalau saa 24 kabla ya muda wa awali,”. 

 

Kutokana na tamko hilo Yanga iligomea mechi na kufanya mchezo huo kuyeyuka mazima ambapo kwa sasa taarifa kutoka Bodi ya Ligi Tanzania, (TPLB) imeeleza kuwa Kamati ya Masaa 72 itakaa ili kujadili suala hilo na kutoa ratiba ya siku ya mcheo huo hizi hapa ni baadhi ya hasara ambazo zimetokana na kuyeyuka kwa dabi hiyo:-

 

Muda

 

Maumivu makubwa kwa mashabiki pamoja na wachezaji kutumia muda mwingi kwa ajili ya maandalizi na mwisho wa siku hakuna ambacho wamekishuhudia.

 

Yupo shabiki wa Yanga ambaye ni mwanariadha Mang’suli Hussein mwenye umri wa miaka 45 yeye alianza safari ya kutoka Kigoma kuanzia Aprili 15 na alifika Bongo Mei 8 siku ya mechi. Ikumbukwe kwamba jamaa aliripoti kwamba kutokana na safari hiyo aliweza kuumwa tumbo baada ya kupima aligundulika na Typhod.

 

Jamaa katua Bongo na juhudi zote ila kaambulia patupu tena alikuja kwa mguu. Hasara kubwa kwa muda wake pamoja na nguvu.

 

Viporo

 

Simba ambao ni wawakilishi wa Tanzania kwenye Ligi ya Mabingwa Afrika wanaongeza idadi ya viporo kwenye mechi zao. Jumla wamecheza mechi 25 watani zao Yanga wamecheza mechi 27.

 

Kwa sasa ipo Afrika Kusini kwa ajili ya mchezo wa Ligi ya Mabingwa Afrika dhidi ya Kaizer Chiefs. Ratiba ilikuwa inaonyesha kwamba Mei 11 alipaswa kucheza na Coastal Union hivyo mchezo huu utakuwa kiporo kwa sababu anacheza na Kaizer Chiefs Mei 15.

 

Weka mbali kiporo hicho pia kuna mechi dhidi ya Namungo ambayo nayo ilikuwa inashiriki Kombe la Shirikisho na ilitinga hatua ya makundi. Hapa ni mechi zote mbili dhidi ya Namungo ni viporo.

 

Kuyeyuka kwa mchezo huo Mei 8 ni kiporo kingine kwa Simba.

 

Nguvu kazi

 

Kuna nguvu kubwa ambayo ilikuwa imetumika kwa ajili ya mchezo huo wa Mei 8 ila kuyeyuka kwake inakuwa ni sawa na hamna kitu.

 

Wapo maripota ambao walifunga safari kutoka nje ya Dar na kuweka kambi kwa muda kwa ajili ya mchezo huo na wengine walitoka nje ya nchi kwa ajili ya mchezo wa Simba v Yanga. Pia hata wale ambao wapo Dar walibadilisha majukumu yao kwa ajili ya mechi, hasara kubwa.

 

Zikumbuke zile ziara ambazo Ofisa Habari wa Simba, Haji Manara alikuwa akizifanya kwenye vyombo vya Habari. Uwekezaji wa Azam TV kwa ajili ya mechi hiyo, dunia nzima ilikuwa inasubiri kushuhudia burudani, ila ghafla nguvu yote imeyuka na mwisho wa siku inakuwa ni habari nyingine.

 

Mkwanja ilikuwa bado kizungumkuti

 

Kwa sasa kila shabiki ambaye aliingia uwanjani anafikiria kuhusu namna gani anaweza kurejeshewa mkwanja wake. Baada ya mchezo kuahirishwa, mashabiki walionekana wakilalamika kuomba kurejeshewa mkwanja wao.

 

Hata Shirikisho la Soka Tanzania, (TFF) wameeleza kuwa wameiagiza Bodi ya Ligi Tanzania, (TPLB) kuweza kushughulikia suala hilo ambalo ni gumzo kwa sasa.

 

Taarifa njema ni kwamba mashabiki watatumia tiketi zao kwenye mchezo ujao pale utakapopangwa 

Kukosekana kwa burudani 

Mashabiki wengi walitarajia kuweza kuona udambwiudambiwi wa wachezaji wao nyota ambao ni pamoja na Clatous Chama, Luis Miquissone, Bernard Morrison kwa Simba na kwa upande wa Yanga walitarajia kuona ufundi wa Saido Ntibanzokiza, Tuisila Kisinda, Yacouba Songne ila mwisho wa siku wameambulia patupu, hasara kwao pia.