MIAKA MINNE UTAWALA WA SIMBA, KUNA SHULE MSIMBAZI, JIUNGENI

Saleh Ally 

MARA ya mwisho Yanga ilibeba ubingwa wa Ligi Kuu Tanzania Bara katika msimu wa 2016/17 ikiwa imelingana kabisa pointi na watani wao wa jadi, Simba.

 

Yanga ilifikisha pointi 68 sawa na Simba, lakini tofauti ya mabao ya kufunga, Yanga ikiwa na GD ya 43 baada ya kufunga mabao 57 na kufungwa 14, Simba ikiwa na GD ya 33 baada ya kufunga 50 na kuruhusu 17.

 

Kama unakumbuka, msimu huu ndio wafungaji bora walikuwa wawili baada ya Saimon Msuva wa Yanga na Abdulrahman Mussa wa Ruvu Shooting kufungana kila mmoja akiwa na mabao 14.

 

Baada ya hapo, sasa ni misimu minne mfululizo, Simba imebeba kombe hilo kubwa zaidi katika mchezo wa soka nchini.

 

Msimu uliofuata wa 2017/18, Simba ilimaliza bingwa baada ya kukusanya pointi 69, Azam FC wakafuatiwa wakiwa na 58 huku Yanga wakimaliza katika nafasi ya tatu wakiwa na pointi 52.

 

Mfungaji bora msimu huu akawa ni Emmanuel Okwi wa Simba akiwa na mabao 20, akafuatiwa na John Bocco wa Simba akiwa na mabao 14 sawa na Marcel Bonaventura Kaheza wa Majimaji ambaye alikuwa mali ya Simba, akiwa huko kwa mkopo.

 

Msimu wa 2018/19, Simba wakawa mabingwa kwa mara ya pili mfululizo, safari hii wakiweka rekodi ya kukusanya pointi 93, Yanga nao walikuwa vizuri, wakawasogelea wakiwa na pointi 86 katika nafasi ya pili huku Azam FC wakiwa na pointi 75 katika nafasi ya tatu.

 

Simba wakafunga mabao 77, wakafuatiwa na Yanga wenye 56 na Azam FC katika nafasi ya tatu wakiwa na mabao 54.

 

Mfungaji bora akawa Meddie Kagere wa Simba akiwa na mabao 23, akafuatiwa na Salim Aiyee wa Mwadui FC aliyetupia 18, halafu Heritier Makambo wa Yanga aliyetupia mabao 17.

 

Msimu wa 2019/20, Simba ikabeba ubingwa kwa mara ya tatu mfululizo, yaani hat trick na kulibeba kombe moja kwa moja. Safari hii Simba ikaandika pointi 88 hadi mwisho wa msimu, ikifuatiwa na Yanga iliyokuwa na 72 na Azam FC tena katika nafasi ya tatu wakiwa na pointi 70.

 

Mfungaji bora wa msimu akawa Kagere tena akiwa na mabao 22, akifuatiwa na Yusuf Mhilu wa Kagera Sugar aliyekuwa na mabao 13 sawa na Waziri Junior wa Mbao FC.

 

Katika misimu hii mitatu, Simba imetwaa mataji ya ubingwa mfululizo, wafungaji bora mfululizo na fowadi na beki kali mara zote mfululizo.

 

Huu ndio msimu wa nne, yaani 2020/21, Simba tayari ni mabingwa wakiwa na pointi 76 lakini wana mechi tatu mkononi na ndio timu pekee yenye uwezo wa kufikisha pointi 80 au zaidi. Simba wana mabao mengi zaidi ya kufunga na safu ngumu zaidi kwa maana ya kuruhusu mabao. Kimoja tu wamezidiwa na Yanga ambao wamepoteza mechi mbili za ligi na Simba wamepoteza tatu.

 

Yanga angalau washinde mechi moja kujihakikishia kushika nafasi ya pili ili waweze kupata nafasi ya kushiriki michuano ya kimataifa ingawa pia wanaweza kuipata kama watawafunga Simba katika fainali ya Kombe la Shirikisho la Azam Julai 25 kwenye Uwanja wa Lake Tanganyika mjini Kigoma.

 

Utawala huu wa Simba ni wa takwimu na ndio uhalisia, hapa unaachana na sifa za kishabiki na unaangalia kuna jambo kubwa sana la kujifunza.

 

Kwani wakati Simba inabeba ubingwa, ina nafasi kubwa sana ya kuibuka na mfungaji bora tena kwa mara ya nne mfululizo pia. Utaona ilikuwa Okwi, akafuatia Kagere mara mbili na sasa inaonekana atakuwa Bocco, Chris Mugalu au Kagere kama hawatatibuliwa na Prince Dube wa Azam FC.

 

Wakati Dube ana mabao 14 sawa na Bocco, Mugalu ana 12 na Kagere ana 11. Utaziona hizi mbio zilivyo na unaona Simba walivyo na nafasi ya kuchukua ubingwa mara nne na taji la mfungaji bora mara nne. Wengine wako wapi na wanafanya nini?

 

Nilitaka kuwakumbusha kwamba kuna jambo timu nyingine zinapaswa kujifunza kupitia Simba badala ya kutaka kuonyesha wanabahatisha au kupendelewa.

 

Haiwezekani Simba wakapendelewa kwa misimu minne mfululizo, ukiachana na ubingwa wakawa na safu bora ya ulinzi, safu bora ya ushambuliaji. Wakatwaa tuzo ya mfungaji bora misimu mitatu mfululizo, tukiwatarajia na wanne, wana jambo linaweza kuwa shule kwa timu nyingine.

 

Simba wamejipanga, wanafanya mambo yao kwa mpangilio na hata usajili wao umepangiliwa na kuna mambo wanafanya yanakwenda kwa utaratibu.

 

Tumeona, hata kimataifa wao ndio wamekuwa gumzo na kuitangaza Tanzania kwa kiasi kikubwa ukiachana na uchangiaji wao wa pointi nyingi zaidi Tanzania kupata timu nne zitakazoshiriki michuano ya klabu ya CAF kwa maana ya Ligi ya Mabingwa Afrika na Kombe la Shirikisho Afrika.

 

Hata kama si kuiga kila jambo lao, kuna nafasi ya kujifunza na kuangalia namna nyingine ambayo itazisogeza timu katika ubora sahihi na baadaye ziwe washindani sahihi wa Simba.

 

Maana kila wakichukua ubingwa, pengo la pointi linakuwa kubwa. Wafungaji wao wanakuwa bora kama ilivyo safu ya ushambulizi lakini tuliona hata alipoondoka Okwi, wengi waliamini Simba watayumba, leo ubora wao ni zaidi ya wa msimu ule Okwi akiondoka. Na umekuwa ukizidi kupanda na kuwafanya wawe gumzo zaidi.

 

Uchezaji wa Simba, leo imefikia hakuna anayeweza kubisha kuhusiana na ubora wao, akikataa itakuwa mdomoni lakini ndani ya nafsi yake, anajua anachokiwaza.

 

Tukubali, walipofikia Simba haiwezi kuwa maombi tu na majaaliwa tu. Kuna matumizi makubwa ya akili, ushirikiano na umoja unaofanya haya yafikiwe. Acheni kujimwambafai, jifunzeni la sivyo, Simba wataendelea kutawala tena na tena.