MAKALA: KIKWETE ‘MCHAWI’

Na Saleh Ally

MARA baada ya Rais Jakaya Mrisho Kikwete kutembelea na kuzindua uwanja wa Azam Complex, kuna mengi sana ambayo yamejitokeza na hakika inawezekana kabisa vyombo vya habari havikutoa nafasi iliyostahili.

Ingawa ilikuwa ni ziara ya uzinduzi wa uwanja huo, Kikwete ambaye anajulikana kwa kuwa mwanamichezo na mwenye mapenzi ya dhati na michezo tokea akiwa mwanafunzi, alisema maneno mazito na huenda yalistahili yapewe nafasi kubwa ili kuwakumbusha wadau ambao wamekuwa wakididimiza michezo.

Siwezi kusema Azam FC wao ni manabii, kila kilichosemwa na Rais Kikwete hakikuwagusa kwa maana wako katika kundi la wakosaji, lakini waliepuka mengi kwa kuwa wameweza kuonyesha mwendo mzuri.

Lakini siwezi kusema Rais Kikwete ni ‘mchawi’, aliyoyasema yako wazi, yanaonekana na kila siku ni wimbo lakini hakuna kinachobadilika.

Madongo yake mengi yaliangukia kwa wakongwe Yanga na Simba kwenye matatizo yasiyoisha. Huenda walikuwa wajanja kwelikweli maana hakuna kiongozi hata mmoja alikubali kutia mguu kule Chamazi Complex, maana wanajua Rais Kikwete ‘hakopeshi’.

Lakini kwa siku moja, Kikwete aligusa mambo mengi sana ya msingi katika soka ya Tanzania, hakumkopesha mtu, hakuwa na aibu wala huruma na wanaovurunda. Inawezekana kabisa ni wakati wa kuyatafakari kwa kuwa Saleh Ally huenda aliyasema mara kadhaa, lakini yakapita sikio la kushoto na kutokea la kulia na wahusika wakaendelea kuboronga kwa hasira zaidi.

Lakini safari hii, Rais wa Tanzania, amefunguka na kusema madudu yote ambayo si siri hata kidogo.  Angalia maisha ya Simba na Yanga, leo Azam FC inaonekana inawapita mengi ndani ya miaka mitano tu, lakini zenyewe zilizaliwa miaka ya 1930 mwanzoni.

Kikwete ameonyesha habatishi, najua kweli uozo ndani ya michezo. Angalia kuhusu kamati za ufundi ambazo ni ushirikina mtupu, kuhonga wachezaji, kucheza kwenye viwanja vya kuanzima au kukodisha, kusajili kwa kukomoana, namna wanachama wanavyoziangusha timu zao. Amechambua kwa kina bila ya kupindisha.

Azam kuogopewa na vigogo:

Kweli Azam FC inaogopewa na vigogo Yanga na Simba na hatari zaidi kwa wale waliokuwa wanaonekana vigogo wa daraja la pili kama Mtibwa Sugar ambao wamekuwa wakitandikwa na Azam FC kama watoto.

Kuwepo kwa Azam FC, kumefanya katika msimu mmoja wa ligi kuwe na ‘big match’ sita badala ya mbili, awali ilikuwa ni Simba na Yanga zinapokutana katika mzunguko wa kwanza na wa pili. Lakini sasa mechi mbili za Yanga dhidi ya Azam na Simba dhidi ya timu hiyo, zimekuwa mechi kubwa na zinazongumziwa sana.

 

Ukiritimba wa Yanga, Simba:

 Zina ukiritimba upi? Unaweza ukafikiri kwamba hazina kitu hicho lakini hakika mashabiki wa timu hizo wamekuwa hawapendi kuona timu nyingine inatamba. Wanaamini mpira wa Tanzania ni Yanga na Simba.

Unaweza ukashangaa wakati mwingine, Yanga na Simba wako tayari kuungana ili kuhakikisha timu nyingine mfano wa Azam FC haiwi bingwa. Kawaida kama ni ushindani, vizuri timu bingwa ifanikiwe kwa uwezo wake.

Kutaka kulazimisha timu ishinde au iwe bingwa kutokana na ukubwa wa jina lake ni tatizo jingine kubwa katika soka nchini. Yanga na Simba wanahusika zaidi katika hili.

Kamati za ufundi:

Kikwete anajua kuhusu kamati ya ufundi, hatari sana. Ina maana hawa jamaa ni maarufu sana kwa kuwa hadi rais anawajua. Tunajua namna ambavyo fedha za klabu hizo zinavyomegwa kwa vigezo vya ujanjaujanja.

Kamati za ufundi ni mitaji ya wanachama  na viongozi maarufu wa klabu hizo, wanaamini eti wakifanya mambo ya ushirikina timu itafanya vizuri. Hali halisi inajulikana, wanajua wanachofanya si sahihi na ni kwa ajili ya maslahi ya klabu zao, badala wao binafsi.

Wakati mwingine imefikia kwa mwezi klabu inatoa hadi Sh milioni 50 kimyakimya eti kwa ajili ya kamati ya ufundi, hapa wanagawana wapambe wa viongozi. Hawa ni adui wa klabu hizo, lakini ndiyo wamekuwa wanafiki wakubwa na wanaofikia hadi kulia machozi kujidai wanazitetea, kumbe wanalilia maduka au ofisi kwa ajili ya kuendesha maisha yao na wala si mapenzi.

Kuhonga wachezaji:

Hili tatizo Rais Kikwete ameonyesha kweli ni mtu wa michezo ikiwemo soka, anajua kila kitu lakini hapa inawezekana kidogo pamoja na kuwakandia Yanga na Simba au timu nyingine, basi angewaasa Azam FC pia.

Sidhani kama Azam FC wanaweza kuwa wasafi moja kwa moja katika hili, inajulikana na mambo ni mengi sana. Bado suala la hongo ni tatizo kubwa sana na wachezaji, viongozi, makocha na hata waamuzi wamekuwa wakihusika.

Hatuwezi kuwatoa Azam FC, bado tunatakiwa kuchunguza. Lakini alichokisema kinaendelea kweli, ingawa wako ambao wamekuwa wakitaka kujisafisha bila ya kujua wanajipaka zaidi vumbi la masizi ya mkaa. Hivi karibuni kulikuwa na taarifa kuna klabu imeunda timu ya kuisaidia kushinda mechi kadhaa kwa kutoa rushwa, anayefanya kazi hiyo anapata mshahara na posho na amepewa usafiri.

Leo rais wa nchi anajua kuhusiana na kinachoendelea kuhusiana na upuuzi huo, lakini kuna watu bado wanaendelea na inaonekana ni mambo ya kawaida kabisa. Hatari sana, iko haja ya kujiangalia na kubadilika, soka linaweza kukua na bila ya rushwa. Fedha wanazotoa, bora wawape vijana kama hamasa.

Viwanja vya kuazima:

Hapa ndiyo sehemu ya kichekesho kabisa, kama Rais Kikwete anajua Yanga na Simba wanatumia viwanja vya kuanzima, maana yake anajua kila kitu kuhusiana na namna Mwenyekiti wa Simba, Ismail Aden Rage ambavyo amekuwa akitoa ahadi za ujanja ujanja kuhusiana na uwanja na hakuna ambacho amekifanya.

Yanga wana uwanja wao, lakini pia wameshindwa hata kuweka ‘pitch’ au sehemu ya kuchezea na badala yake wamekuwa wakitangatanga kutafuta uwanja wa kufanyia mazoezi. Kocha wao Ernie Brandts ya mungu amekuwa akilia. Wao wanaona ndiyo maisha mazuri!

Kambi za uhakika:

Mlo wa wachezaji wa Kitanzania ni tatizo, Rais Kikwete alisisitiza ni vizuri wakala vizuri badala ya kuendeleza tabia ya kula chips na mayai. Pia akashauri wachezaji walale pazuri. Ukiangalia hapa anazungumza masuala ya kitaalamu.

Yote hayo yamewashinda viongozi na hata wachezaji wenyewe kwa kuwa wamekuwa wazito kujua au kuamini ya wanachoelekezwa. Wachezaji hawataki kupumzika, ikiwezekana wanaona kuzunguka mitaani na kuonekana, au kwenda kucheza ndondo wakati wanatakiwa kupumzika ndiyo jambo sahihi.

Lakini bado viongozi wanaamini wachezaji kula vizuri, kulala sehemu nzuri ni suala la anasa. Mifano yao ni ileile kwamba wachezaji wa zamani kama akina Sembuli, Ma:

 Kusajili mchezaji, asicheze timu nyingine:

 Wakati mwingine unajiuliza, rais anajua kuhusiana na upuuzi huu hasa wa Yanga na Simba, kweli anafuatilia soka. Maana amelizungumzia suala ili, nakumbuka niliwahi kuandika ukurasa mzima nikieleza namna Yanga na Simba zinavyoweza kukomoana bila ya kujali hasara.

Timu moja inaweza ikaamua kumsajili mchezaji fulani wakati haimhitaji, eti kisa anaweza kusajiliwa na timu nyingine halafu ikapata sifa. Haiangalii yenyewe inahitaji nini badala yake mtani wake anafanya nini, huo ni upuuzi!

Hili limekuwa ni tatizo na utaona kuna wakati timu zinafeli kwa kuwa zilisajili kwa lengo la kupata sifa kwa mashabiki na wanachama wake au kukomoa upande mwingine. Wakati mwingine viongozi wakiona upuuzi umewazidi uzito, wanauangushia kwa makocha na ikiwezekana wanawatimua

Wanachama:

Hapa ndiyo kasheshe, sikushangaa Rais Kikwete kuonyesha anawajua vizuri wanachama wa timu hizi. Amesema anaamini Azam FC inaweza kufika mbali kwa kuwa haiendeshwi  na wanachama.

Lakini kauli hii ya Kikwete, kwamba wanachama zaidi wao ndiyo wanazitegemea klabu kujiendesha ni kweli, kama nilivyoeleza awali. Wako wale wanaozipenda Yanga na Simba kwa kuwa wanajua watakaa milangoni na kufanikiwa kupata cha ‘juu’.

Wanazipenda ili waishi, lakini si mapenzi ya dhati. Wanachama wengi ndiyo wanaoongoza kuzidhoofisha klabu zao, wababaishaji na adui wakubwa wa maendeleo ya klabu hizo, nitatoa mifano.

Viongozi wasio na uwezo, lakini wenye uwezo wa kutoa hongo wamekuwa wakishinda uchaguzi na mwisho wanakua sumu kwenye maendeleo ya klabu hizo, ukiangalia chanzo ni wanachama waliojali maslahi yao, matumbo yao kwa kuchukua hongo na kuwapigia kura wasio na uwezo.

Kweli nani atafanya hivyo kwa Azam FC, ndiyo kama alivyosema Rais Kikwete itakuwa na nafasi ya kuendelea haraka zaidi kwa kuwa hakuna longolongo kupindukia na hadithi nyingi za kusema “sisi ndiyo wenye klabu”, kumbe hata ada ya Sh 1000 kwa mwezi hawalipi na badala yake wanajali nafsi zao na kuwa tatizo tu.

SOURCE: CHAMPIONI JUMATATU