BALE MCHEZAJI BORA LIGI KUU ENGLAND

Gareth Bale ameonyesha hazuiliki baada ya kufanikiwa kutwaa tuzo zote mbili za mchezaji bora wa mwaka wa England na ile ya mchezaji bora zaidi kijana zote maarufu kama PFA.

Kiungo huyo mwenye kasi wa Tottenham Hotspur ,23, ametwaa tuzo zote na kuingia kwenye rekodi ya kuzibeba zote kwa wakati mmoja kama alivyofanya Andy Gray mwaka 1976-77 na Cristiano Ronaldo, miaka sita iliyopita.

Wengine waliowahi kubeba tuzo hiyo mara mbili kwa nyakati tofauti ni Mark Hughes, Alan Shearer, Thierry Henry na Ronaldo. Kwani aliwahi kuichukua kwa mara ya kwanza mwaka 2010-11.

Wapinzani wakubwa wa Bale katika tuzo hiyo (si ya vijana) walionekana kuwa Robin van Persie wa Man United na Luis Suarez wa Liverpool ambaye mwisho alionekana kujiondoa baada ya kuingia katika kashfa ya kung’ata beki wa Chelsea, Branislav Ivanovic.

Akizungumzia tuzo hizo, Bale alisema: “Ni kitu kizuri na cha kujivunia, kuchaguliwa na wachezaji wenzako ambao wakati mwingine ni wapinzani wako. Hakika ni kitu cha kujivunia kwangu.

“Ukiangalia katika majina makubwa yaliyofanikiwa kutwaa tuzo hii, unajiuliza mara mbili. Lakini nisingefanikiwa bila ya ushirikiano wa wachezaji wenzangu pamoja na kocha wangu, nawapa tuzo hizi kama zawadi.

“Washiriki wengine ambao hawakupata, pia walifanya kazi nzuri sana katika klabu zao na hawapaswi kujisikia vibaya kutokana na kukosa tuzo hii.”

Bale, tegemeo kubwa la Spurs, amefunga mabao 19 katika mechi 29 za Ligi Kuu England msimu huu, moja ya mabao yake yaliipa ushindi Tottehnam kwenye Uwanja wa Old Trafford unaomilikiwa na Man United, awali haikuwa imewahi kushinda uwanjani hapo kwa miaka 23 iliyopita.

Pamoja na Bale, PFA walichagua kikosi bora cha msimu ambacho kilipangwa kama ifuatavyo. Kipa, De Gea (Man United), Zabaleta (Man City), Baines (Everton), Ferdinand (Man United), Vertonghen (Spurs), Carrick (Man United), Hazard (Chelsea), Mata (Chelsea), Suarez (Liverpool), van Persie (Man United) na Bale (Spurs).