MSHAMBULIAJI MTANZANIA AZIDI KUULA NEPAL

Na Saleh Ally

MSHAMBULIAJI Mtanzania, Yona Ndabila ameula baada ya timu kongwe ya nchini Nepal ya Manang FC kumsajili.

Awali Ndabila alikuwa anakipiga katika timu ya Saraswati Youth Club ya nchini humo na akamaliza msimu akiwa wa pili katika upachikaji mabao.

Akizungumza na gazeti hili, Ndabila ambaye yuko nchini kwa mapumziko alisema amesaini mkataba wa mwaka mmoja na timu hiyo.

“Kwangu ni faraja kwa kuwa timu hiyo ni kati ya mbili kubwa nchini Nepal, nimekwenda kutafuta mafanikio hivyo ninajisikia vizuri.

“Lakini ninaona nina deni ambalo liko mbele yangu lakini nitajituma kuhakikisha ninapata mafanikio zaidi,” alisema Ndabila.

Tayari Ndabila ameondoka nchini kurejea Nepal kwa ajili ya kujifua na kikosi chake hicho kipya.

Lakini Mtanzania mwingine, kiungo wa zamani wa Yanga, Godfrey Bonny naye anarejea katika timu yake ya Saraswati Youth Club.

Ndabila alianza kuchipukia kisoka mkoani Mbeya na alifanya vizuri akiwa na Prisons ya mjini humo na baadaye Mtibwa Sugar.

 

Ndabila, wa tatu kushoto waliosimama, akiwa na Mtibwa Sugar...

Wakati akiwa nchini aliwahi kuitwa katika kikosi cha timu ya Taifa Stars, Marcio Maximo lakini hakudumu muda mrefu.